Поўная версія

"Спявачка сусвету" Надзея Кучар стала запрошанай артысткай Вялікага тэатра Беларусі

Культура 12.01.2018 | 13:02
Надзея Кучар. Фота з архіва
Надзея Кучар. Фота з архіва

12 студзеня, Мінск /Кар. БЕЛТА/. "Спявачка сусвету" Надзея Кучар стала запрошанай артысткай Нацыянальнага акадэмічнага Вялікага тэатра оперы і балета Беларусі, паведамілі карэспандэнту БЕЛТА ў тэатры.

У канцы мінулага года Надзею Кучар можна было ўбачыць і пачуць на галоўных музычных пляцоўках Мінска: у лістападзе яна дала свой сольны канцэрт у Белдзяржфілармоніі, а ў снежні адбыўся яе дэбют у партыі Царыцы ночы з "Чароўнай флейты". Прыемна, што адбылося гэта на роднай сцэне Вялікага тэатра Беларусі. "Безумоўна, арыі з моцартаўскай оперы я вывучыла вельмі даўно і спявала іх на самых розных пляцоўках, - расказала Надзея Кучар. - Але гэта былі выключна канцэртныя выступленні. У спектаклі я не спявала ніколі. Тым больш я была на прэм'еры гэтай оперы ў Мінску - мне вельмі спадабалася пастаноўка Ханса-Ёахіма Фрая". "Спявачка сусвету" прыняла ўдзел і ў грандыёзным гала-канцэрце зорак, які закрываў Калядны оперны форум у Вялікім. У новым жа годзе Надзея Кучар будзе выступаць на яго сцэне ў новым статусе - запрошанай салісткі тэатра.

Мінчанка Надзея Кучар з адзнакай скончыла сталічнае музычнае вучылішча імя М.І. Глінкі па спецыяльнасці "Музыказнаўства". Пазней паступіла ў Санкт-Пецярбургскую дзяржаўную кансерваторыю імя М.А. Рымскага-Корсакава. Яна скончыла клас сольных спеваў прафесара Тамары Навічэнка, у ліку знакамітых выпускнікоў якой Ганна Нятрэбка, Вераніка Джыоева, Галіна Шайдагбаева.

Надзея Кучар не раз станавілася пераможцай многіх прэстыжных конкурсаў: яна заваявала першыя прэміі на фестывалі духоўнай музыкі "Магутны Божа" (Беларусь, 2006), на конкурсе оперных спевакоў "Санкт-Пецярбург" (Расія, 2007), на конкурсе вакалістаў Бібігуль Тулегенавай (Казахстан, 2007), на конкурсе вакалістаў у Хертагенбасе яна ўзяла Гран-пры, прыз сімпатый гледачоў і прыз імя Ераніма Босха (Нідэрланды, 2012). І ўсё ж такі для гледачоў адной з самых важных яе вікторый стала перамога на конкурсе оперных спевакоў BВC у Кардыфе (Вялікабрытанія, 2015). "Я да гэтага стаўлюся са значна меншым пафасам, - гаворыць Надзея Кучар. - "Спявак сусвету" - гэта ўсяго толькі назва конкурсу. Я сказала б, што гэта была мая асабістая перамога. Калі мяне запрасілі ўдзельнічаць у фінале ў Кардыф, для сябе дакладна вызначыла: незалежна ад выніку я завяршаю сваю конкурсную кар'еру. Але гэта перамога, вядома, была для мяне вельмі знакавай падзеяй. Перад сабой магу сумленна прызнацца: я дастойна выканала вялікі аб'ём работы, ён заняў у мяне не адзін год, але цяпер усё гэта ў мінулым. Я не адчуваю ні недагаворанасці, ні недаробленасці. Проста шчасліва, што я ўсё выканала і зрабіла ўсё па максімуму. Мне гэта ўдалося…"

Дэбютнай роллю Надзеі Кучар у тэатры Санкт-Пецярбургскай кансерваторыі стала партыя Марфы ў "Царскай нявесце". "Марфа ў "Царскай нявесце" Мікалая Рымскага-Корсакава - першая роля, аб якой я марыла ў сне і наяве, - успамінае артыстка. - Гэта опера была для мяне сапраўдным адкрыццём і чымсьці неверагодным застаецца да гэтага часу. Я адчуваю гэту музыку і эмацыянальную драматычную нагрузку, якая ў ёй закладзена, проста на 200 працэнтаў! Гэта маё да глыбіні душы. Калі спявала ў хоры беларускага Вялікага, зразумела, ведала на памяць не толькі саму ролю Марфы, але і ўсю оперу. А паступіўшы ў Санкт-Пецярбургскую кансерваторыю, з задавальненнем хадзіла на заняткі па "Царскай нявесце" да іншых дзяўчат-студэнтак: глядзела, слухала, убірала і набірала - і да канца першага курса я праспявала аркестровую рэпетыцыю, а ў пачатку другога ўжо дэбютавала ў ролі Марфы. Так мая вялікая мара ўвасобілася ў жыццё..."

У 2009-м Надзея Кучар дэбютавала ў пецярбургскім Міхайлаўскім тэатры ў партыі Віялеты ў "Травіяце" Вердзі. У 2012-м стала салісткай Пермскага акадэмічнага тэатра оперы і балета імя П.І. Чайкоўскага. Менавіта праекты Тэадора Курэнтзіса (мастацкі кіраўнік Пермскай оперы з 2011 года) прынеслі ёй дзве "Залатыя маскі" - за выкананне партыі Медэі ў оперы Medeamaterial (2013) і партыі Доньі Ісабель у сямі-оперы "Каралева індзейцаў" (2015). У 2014-м Кучар дэбютавала ў партыі Эльвіры ў оперы "Пурытане" Беліні ў Муніцыпальным тэатры Сант'яга (дырыжор Хасэ Мігель Перэс-Сьера, рэжысёр Эміліа Сагі). У 2015-м у Надзеі адбылося некалькі замежных ангажэментаў: у верасні яна ўпершыню ў сваёй кар'еры выканала партыю Мацільды ў оперы "Вільгельм Тэль" Дж. Расіні ў Вялікім тэатры Жэневы (дырыжор Хесус Лопес Кобас, рэжысёр Дэвід Паўнтні), а ў снежні праспявала партыю Віялеты ў "Травіяце" на сцэне берлінскай Staatsoper im Schiller Theater (дырыжор Даніэль Барэнбойм, рэжысёр Дытэр Дорн).-0-

Навіны рубрыкі Культура
Фотапраект "Я бачу сэрцам" пакажа непаўторнае хараство Беларусі
20 красавіка, 17:59
Нацыянальны гістарычны музей збірае дзіцячыя кнігі на беларускай мове для дыяспары
20 красавіка, 17:29
Выстава да 85-годдзя Вялікага тэатра Беларусі адкрылася ў НББ
19 красавіка, 17:07
Заяўкі на ўдзел у конкурсе "Нацыянальная літаратурная прэмія-2018" прымаюцца да 1 ліпеня
19 красавіка, 15:30
Дні беларускага кіно пройдуць 20-24 красавіка ў Маскве
19 красавіка, 13:28
Грамадства павінна быць актыўным удзельнікам у вырашэнні пытанняў аховы гісторыка-культурнай спадчыны - меркаванне
19 красавіка, 12:39
Карціна Георгія Скрыпнічэнкі "Мастак і мадэль" Выстава пад адкрытым небам беларускага сюррэаліста Георгія Скрыпнічэнкі адкрыецца ў Мінску
18 красавіка, 17:55
Акцёры з Беларусі прымуць удзел у летняй школе Саюза тэатральных дзеячаў РФ
18 красавіка, 17:13
Сустрэчу музейшчыкаў Беларусі і Расіі плануецца правесці на "Славянскім базары ў Віцебску"
18 красавіка, 15:02
Поўная версія