16 сакавіка, Мінск /Кар. БЕЛТА/. Мясцовыя органы ўлады прадставяць прапановы па стымуляванні зацікаўленасці ўласнікаў аб'ектаў гісторыка-культурнай спадчыны ў іх рэстаўрацыі. Аб гэтым паведаміла на прэс-канферэнцыі намеснік начальніка ўпраўлення па ахове гісторыка-культурнай спадчыны Міністэрства культуры Наталля Хвір, перадае карэспандэнт БЕЛТА.
На нядаўняй калегіі Міністэрствам культуры прынята рашэнне аб неабходнасці распрацоўкі падыходаў па стымуляванні ўдзелу фізічных і юрыдычных асоб у рэстаўрацыі аб'ектаў гісторыка-культурнай спадчыны, а таксама захаванні аб'ектаў нематэрыяльнай спадчыны.
У Мінкультуры лічаць, што мясцовыя органы ўлады, ведаючы сітуацыю знутры, могуць унесці прапановы, якім чынам стымуляваць інтарэс уласнікаў аб'ектаў, уключаных у Дзяржаўны спіс гісторыка-культурных каштоўнасцей. Магчыма, гэта могуць быць пэўныя фінансавыя паслабленні, адзначыла Наталля Хвір.-0-
