6 красавіка, Мінск /Кар. БЕЛТА/. ІІ Велікодны фестываль пройдзе ў Беларускай дзяржаўнай акадэміі музыкі з 11 па 13 красавіка, паведамілі БЕЛТА ў БДАМ.
У праграму фестывалю ўвойдуць канцэрты ў выкананні некалькіх пакаленняў лепшых студэнцкіх творчых калектываў і салістаў з ліку выкладчыкаў і выпускнікоў акадэміі, лаўрэатаў міжнародных конкурсаў, лаўрэатаў і стыпендыятаў спецыяльнага фонду Прэзідэнта Беларусі па падтрымцы таленавітай моладзі, з імёнамі якіх звязана сучаснае і будучае беларускай музычнай культуры.
Адкрыццё ІІ Велікоднага фестывалю з удзелам студэнцкага хору адбудзецца 11 красавіка. На наступны вечар у Вялікай зале БДАМ пройдзе канцэрт камернага аркестра. У закрыцці фестывалю прымуць удзел праслаўленая оперная спявачка, вядучая салістка Вялікага тэатра заслужаная артыстка Рэспублікі Беларусь Аксана Волкава і студэнцкі сімфанічны аркестр пад кіраўніцтвам Андрэя Галанава.
Велікодны фестываль накіраваны на далучэнне моладзі да вечных духоўных каштоўнасцей нацыянальнага і сусветнага музычнага мастацтва, а таксама на ўмацаванне адной з асноўных традыцый ВНУ - творчай пераемнасці пакаленняў.
Гэты творчы праект быў упершыню праведзены ў 2017 годзе і стаў яркай падзеяй у культурным жыцці краіны. Нараўне з буйнымі творчымі праектамі акадэміі "Дакрананне" і "Талент краіны", ажыццёўленымі пры садзейнічанні спецыяльнага фонду Прэзідэнта Беларусі па падтрымцы таленавітай моладзі, І Велікодны фестываль заслужана атрымаў высокую ацэнку і шырокі грамадскі рэзананс у краіне і ўвайшоў у лік мерапрыемстваў, удастоеных Спецыяльнай прэміі Прэзідэнта дзеячам культуры і мастацтва ў 2017 годзе.-0-
