6 сакавіка, Масква /Эдуард Півавар - БЕЛТА/. Адным з галоўных дэстабілізуючых фактараў для Беларусі і Расіі з'яўляецца нарошчванне сіл НАТА ў Еўропе. Аб гэтым заявіў сёння на прэс-канферэнцыі ў Маскве начальнік Аб'яднанага штаба АДКБ Анатоль Сідараў, перадае карэспандэнт БЕЛТА.
"Да ліку выклікаў для дзяржаў - членаў АДКБ Расіі і Беларусі адносіцца нарошчванне ваеннай дзейнасці ЗША і НАТА ва Усходняй Еўропе, - сказаў Анатоль Сідараў. - Брусель і Вашынгтон насуперак узятым на сябе міжнародным абавязацельствам разгортваюць дадатковыя органы ваеннага кіравання і воінскія кантынгенты ў Польшчы і краінах Балтыі. Пад прыкрыццем прынцыпу ратацыі фактычна на пастаяннай аснове ўжо некалькі гадоў у рэгіёне ўтрымліваецца і паслядоўна нарошчваецца шматнацыянальная групоўка войскаў".
У прыватнасці, паводле слоў начальніка Аб'яднанага штаба АДКБ, толькі ў другой палавіне мінулага года ў Латвіі, Літве, Польшчы і Эстоніі завершана разгортванне чатырох батальённых тактычных груп шматнацыянальнага складу. На польскую тэрыторыю перакінута бранятанкавая брыгада сухапутных войскаў ЗША. У Румыніі разгорнута шматнацыянальная брыгада. "Такім чынам, групоўка войскаў НАТА на ўсходнім флангу блока цяпер складае да 12 тыс. ваеннаслужачых", - адзначыў Анатоль Сідараў.
"Адначасова Вашынгтон паслядоўна рэалізуе праграму па разгортванні еўрапейскага сегмента сістэмы проціракетнай абароны, накіраванай на нівеліраванне магчымасцей сіл ядзернага стрымлівання Расіі, - сказаў начштаба. - У Румыніі пастаўлена ўжо на баявое дзяжурства амерыканская база проціракетнай абароны. У Польшчы прадаўжаецца будаўніцтва базы ПРА, якая можа быць уведзена ў строй да канца 2018-га і дасягнуць баявой гатоўнасці да сярэдзіны наступнага года".
Закранаючы аператыўную і баявую падрыхтоўку краін - членаў НАТА, Анатоль Сідараў адзначыў, што ў 2018 годзе на еўрапейскім кантыненце альянсам плануецца правесці ўдвая больш ваенных вучэнняў, чым у 2017-м.
Адным з галоўных дэстабілізуючых фактараў калектыўнай бяспекі ў рэгіёне Усходняй Еўропы начальнік Аб'яднанага штаба АДКБ назваў таксама абстаноўку ва Украіне, якая застаецца напружанай.
На яго думку, праблемы бяспекі ў Каўказскім рэгіёне калектыўнай бяспекі абумоўлены наяўнасцю замарожаных канфліктаў, а таксама імкненнем Захаду ўмацаваць свой уплыў у гэтым рэгіёне. "Вельмі негатыўны ўплыў на сітуацыю на Каўказе і ў іншых рэгіёнах калектыўнай бяспекі прадаўжае аказваць канфлікт у Сірыі", - канстатаваў начштаба.
Гаворачы аб сітуацыі ў Цэнтральна-Азіяцкім рэгіёне, Анатоль Сідараў указаў, што для яго таксама характэрны сур'ёзны рост дэстабілізуючых тэндэнцый. "Пры гэтым асноўнымі пагрозамі тут з'яўляюцца дзейнасць міжнародных тэрарыстычных арганізацый у Афганістане і магчымы перанос іх дзеянняў на тэрыторыю дзяржаў Цэнтральнай Азіі, распаўсюджванне рэлігійнага экстрэмізму, павелічэнне незаконнага абароту наркатычных сродкаў", - падкрэсліў ён.-0-
