10 лютага, Мінск /Кар. БЕЛТА/. Змешанымі эстафетамі ў трох узроставых катэгорыях сёння завяршыліся рэспубліканскія спаборніцтвы па біятлоне "Снежны снайпер". Фінальны этап турніру праходзіў у цэнтры алімпійскай падрыхтоўкі "Раўбічы" 8 і 10 лютага, паведамляе карэспандэнт БЕЛТА.
У малодшай узроставай групе гэтай эстафеты на вышэйшую прыступку п'едэстала ўзнялася каманда Мінска з рэзультатам 27 мін 11,2 сек. Сярэбраную ўзнагароду заваявала зборная Мінскай вобласці - 27 мін 32,7 сек. Бронзавы медаль дастаўся гродзенскім спартсменам, якія адсталі ад лідара гонкі на 1 мін 46,8 сек.
У старэйшай узроставай групе мацнейшай стала каманда Мінска - 32 мін 25,1 сек. На другой пазіцыі размясціліся спартсмены з Гомельскай вобласці (адставанне 48,6 сек), на трэцім радку падагульняючага пратакола знаходзіцца каманда Гродзенскай вобласці (адставанне 1 мін 54,7 сек).
Як паведамлялася, першае месца ў змешанай эстафеце сярэдняй узроставай групы заваявала каманда Мінска з рэзультатам 30 мін 37,8 сек. Другое месца занялі спартсмены з Мінскай вобласці з адставаннем ад лідараў гонкі 30,6 сек. Трэцяя пазіцыя дасталася атлетам з Гомельскай вобласці - 31 мін 26,5 сек.
Узнагароджанне юных біятланістаў праводзіла чатырохразовая алімпійская чэмпіёнка па біятлоне Дар'я Домрачава, якая пажадала юным спартсменам поспеху ва ўсіх пачынаннях.
Міністр спорту і турызму Беларусі Сяргей Кавальчук адзначыў добрую падрыхтоўку атлетаў. "Спартсмены прыгожа бягуць, выдатна страляюць. Думаю, за імі будучыня біятлона", - сказаў ён.
Рэспубліканскія спаборніцтвы сярод дзяцей і падлеткаў па біятлоне "Снежны снайпер" праводзяцца з 2007 года.
Арганізатарамі спаборніцтваў выступілі рэспубліканскае дзяржаўна-грамадскае аб'яднанне "Прэзідэнцкі спартыўны клуб", Міністэрства спорту і турызму, Міністэрства адукацыі, Беларуская федэрацыя біятлона, Мінгарвыканкам і Мінаблвыканкам.-0-
Фота Максіма Гучака, Дзяніса Касцючэнкі
