Поўная версія

Вярхоўная рада распусціла ЦВК Украіны

У свеце 13.09.2019 | 17:54
Фота УКРІНФАРМ
Фота УКРІНФАРМ

13 верасня, Кіеў /БЕЛТА - УКРІНФАРМ/. Вярхоўная рада Украіны прыняла пастанову аб датэрміновым спыненні паўнамоцтваў усяго складу Цэнтральнай выбарчай камісіі краіны.

Адпаведнае рашэнне падтрымаў 341 народны дэпутат пры мінімальна неабходных 300.

"У адпаведнасці з пунктам 21 часткі першай артыкула 85 Канстытуцыі Украіны і артыкула 311 закона "Аб Цэнтральнай выбарчай камісіі" і ўлічваючы матываванае прадстаўленне прэзідэнта Украіны, Вярхоўная рада пастанаўляе: спыніць датэрмінова паўнамоцтвы ўсяго складу Цэнтральнай выбарчай камісіі", - гаворыцца ў дакуменце.

Прэзідэнт краіны Уладзімір Зяленскі 9 верасня ўнёс у Вярхоўную раду прадстаўленне аб датэрміновым спыненні паўнамоцтваў членаў ЦВК, матываваўшы яго тым, што пры ажыццяўленні рэгістрацыі ЦВК нібыта дзейнічала прадузята і насуперак прынцыпам, вызначаным выбарчым заканадаўствам. У прадстаўленні таксама адзначаецца, што 28 рашэнняў ЦВК былі адменены судамі.

Пастанова ўступае ў сілу з дня яе прыняцця.-0-

Навіны рубрыкі У свеце
Поўная версія