Поўная версія

ААН выдзеліць $1 млн для дапамогі пацярпелым ад "Дорыяна" жыхарам Багамскіх астравоў

У свеце 05.09.2019 | 10:22
Фота Берагавой аховы ЗША
Фота Берагавой аховы ЗША

5 верасня, Мінск /Кар. БЕЛТА/. Намеснік кіраўніка ААН па гуманітарных пытаннях Марк Лакок заявіў, што ААН выдзеліць на аказанне дапамогі пацярпеламу ад урагану "Дорыян" насельніцтву Багамскіх астравоў $1 млн. Аб гэтым паведамляе Цэнтр навін ААН.

Каардынатар надзвычайнай дапамогі і намеснік генеральнага сакратара ААН Марк Лакок прыбыў на Багамы. У сталіцы краіны Насау ён сустрэўся з прэм'ер-міністрам Х'юбертам Мінісам і запэўніў яго ў падтрымцы з боку ААН. Марк Лакок, у прыватнасці, паведаміў прэм'еру, што ААН выдзеліць $1 млн на аказанне дапамогі Багамам з Цэнтральнага фонду рэагавання на надзвычайныя сітуацыі. Гэты фонд, паводле слоў намесніка генеральнага сакратара ААН, быў створаны якраз для таго, каб арганізацыя магла тэрмінова дапамагчы ў выпадку бяды, не чакаючы, пакуль донары дадуць сродкі.

"Багамы, вядома, багатая дзяржава, і вялікую частку дапамогі пацярпелым выдзяляюць улады краіны. Аднак гэта маштабная катастрофа, у выніку якой пацярпела каля 20 працэнтаў насельніцтва, і, я думаю, у гэтым выпадку міжнародная супольнасць павінна ўмяшацца і аказаць дапамогу Багамам", - заявіў Марк Лакок.

Раней на Багамы адправіліся прадстаўнікі Сусветнай харчовай праграмы (СХП) і ўпраўлення ААН па каардынацыі гуманітарных пытанняў (УКГП), каб ацаніць сітуацыю і зразумець, якія патрэбнасці пацярпелых жыхароў астравоў. Паводле папярэдніх ацэнак, паведаміў Марк Лакок, у тэрміновай гуманітарнай дапамозе на Багамах маюць патрэбу амаль 70 тыс. чалавек. Ім патрэбна пітная вада, прадукты харчавання, медыцынская дапамога і часовае жыллё.

Ураган "Дорыян" абрушыўся на астравы 1 верасня і цяпер знаходзіцца ў раёне ўзбярэжжа амерыканскага штата Джорджыя, рухаецца ў напрамку Паўднёвай Караліны са скорасцю каля 3,5 м/с. Скорасць ветру ў межах урагану перавышае 49 м/с. Шэраг штатаў ЗША аб'явіў аб увядзенні рэжыму НС, з прыбярэжных зон былі эвакуіраваны жыхары. Паводле апошніх даных, колькасць загінулых ад урагану "Дорыян" на Багамскіх астравах узрасла да 20 чалавек.-0-

Навіны рубрыкі У свеце
Поўная версія