Поўная версія

Саўмін удакладніў, як выплачваюцца ўзнагароджанні інфарматарам, якія паведамілі аб фактах карупцыі

Грамадства 13.09.2019 | 15:48

13 верасня, Мінск /Кар. БЕЛТА/. Савет Міністраў удакладніў, як выплачваецца ўзнагароджанне фізічнай асобе, якая садзейнічае выяўленню карупцыі. Абноўленыя правілы прадугледжаны пастановай Саўміна ад 12 верасня нумар 619, паведамілі карэспандэнту БЕЛТА ў прэс-службе ўрада.

Канкрэтызавана, у якіх выпадках магчымы выплаты. Напрыклад, калі фізічнай асобай прадастаўлена інфармацыя, прадметы і дакументы, якія дапамаглі выявіць карупцыйнае злачынства; звесткі аб знаходжанні карупцыянера, якога шукаюць; інфармацыя аб месцазнаходжанні грошай і іншай маёмасці, атрыманых у выніку ўчынення карупцыйнага злачынства, а таксама іншая інфармацыя, якая садзейнічае прадухіленню або кампенсаванню шкоды, прычыненай карупцыяй.

Памеры выплат застаюцца ранейшымі. Пры садзейнічанні выяўленню, спыненню, раскрыццю або расследаванню карупцыйнага злачынства, якое належыць да катэгорый цяжкіх або асоба цяжкіх злачынстваў, - да 50 базавых велічынь (1 БВ - Br25,5); якое належыць да катэгорыі менш цяжкіх злачынстваў, - да 30 базавых велічынь.

Рашэнне аб выплаце ўзнагароджання і іншых выплат прымаецца не пазней за 6 месяцаў з даты ўступлення прыгавору суда ў законную сілу, прыняцця рашэння па матэрыялах праверкі аб адмове ва ўзбуджэнні крымінальнай справы або спыненні вядзення па крымінальнай справе па падставах, прадугледжаных у пунктах 3, 4, 7 і 13 часткі 1 артыкула 29 і ў артыкуле 30 Крымінальна-працэсуальнага кодэкса. Узнагароджанне выплачваецца з пісьмовай згоды фізічнай асобы на працягу года з даты прыняцця рашэння аб выплаце.

Парадак і ўмовы накіравання хадайніцтва органа крымінальнага праследавання, выплаты ўзнагароджання і іншых выплат устанаўліваюцца Генеральнай пракуратурай.

Пастанова ўступае ў сілу пасля яе афіцыйнага апублікавання.-0-

Навіны рубрыкі Грамадства
Поўная версія