Поўная версія

Мясніковіч абмеркаваў з Мацвіенка беларуска-расійскае супрацоўніцтва

Грамадства 21.11.2019 | 18:43
Фота з архіва
Фота з архіва

21 лістапада, Мінск /Кар. БЕЛТА/. Сустрэча спікераў верхніх палат парламентаў Беларусі і Расіі адбылася ў Санкт-Пецярбургу, дзе 21-22 лістапада праходзяць пасяджэнне Савета МПА СНД і 50-е пленарнае пасяджэнне МПА СНД. Міхаіл Мясніковіч і Валянціна Мацвіенка абмеркавалі пытанні беларуска-расійскага супрацоўніцтва, паведамілі БЕЛТА ў прэс-службе Савета Рэспублікі.

Міхаіл Мясніковіч адзначыў, што на парламенцкім узроўні ёсць поўнае ўзаемаразуменне адносна адпрацоўкі механізмаў паглыблення інтэграцыі, над якімі працуюць урады. "Пытанне ідзе эвалюцыйна, безумоўна, не без бар'ераў. У кожнага боку ёсць пэўныя інтарэсы, і трэба знайсці тыя рашэнні, якія маглі б усіх задавольваць, - адзначыў старшыня Савета Рэспублікі. - З Саветам Федэрацыі ёсць поўнае ўзаемаразуменне па падыходах, зыходзячы з таго прынцыпу, што дамаўляюцца дзве суверэнныя дзяржавы, якія праводзяць сваю ўласную палітыку".

Спікер выказаў упэўненасць у тым, што бакі змогуць знайсці агульныя падыходы. "Дарожныя карты, якія фарміруюцца, могуць быць прадметам разгляду ў снежні на ўзроўні кіраўнікоў дзяржаў, а магчыма, і Вышэйшага дзяржсавета Саюзнай дзяржавы (мы гэта пытанне таксама абмяркоўвалі), калі ўсё будзе зроблена так, як плануецца", - растлумачыў ён.

Важна, каб у працэсе адпрацоўкі інтэграцыйных пытанняў не ўзнікалі новыя правілы, падкрэсліў Міхаіл Мясніковіч. "На жаль, даводзіцца канстатаваць, што адбываецца так: дамовіліся, ідзе адпрацоўка тых ці іншых дакументаў, а потым крыху змяняюцца правілы. І гэта ўносіць пэўны дысбаланс, калі вымушаны працаваць не толькі эканамічныя, але і палітычныя структуры", - дадаў ён.

Як паведамлялася, 21 лістапада на пасяджэнні Савета МПА СНД разгледжаны вынікі апошніх пасяджэнняў саветаў кіраўнікоў дзяржаў і ўрадаў Садружнасці. Абмеркаваны таксама работа над праектамі Стратэгіі эканамічнага развіцця СНД на перыяд да 2030 года, план мерапрыемстваў МПА СНД да 75-годдзя Перамогі ў Вялікай Айчыннай вайне, праект перспектыўнага плана мадэльнай заканатворчасці ў СНД на 2020-2022 гады. У пятніцу, 22 лістапада, пройдзе пленарнае пасяджэнне МПА СНД, дзе будуць разгледжаны мадэльныя законы аб абавязковым праве, аб рэкламе, аб сацыяльным і экалагічным турызме. Парламентарыі абмяркуюць праекты рэкамендацый адносна прымянення прынцыпаў міжнароднага гуманітарнага права пры процідзеянні тэрарызму і насільным праявам экстрэмізму, а таксама адносна арганізацыі нацыянальных цэнтраў экалагічнай бяспекі.-0-

Навіны рубрыкі Грамадства
Поўная версія