Поўная версія

Краіны СНД маюць намер удасканаліць работу па барацьбе з карупцыяй - Чайка

Грамадства 11.07.2019 | 14:25

11 ліпеня, Мінск /Кар. БЕЛТА/. Краіны СНД маюць намер удасканаліць работу па барацьбе з карупцыяй, заявіў на пасяджэнні Міждзяржаўнага савета па процідзеянні карупцыі ў Выканаўчым камітэце СНД у Мінску генеральны пракурор Расіі Юрый Чайка, перадае карэспандэнт БЕЛТА.

"Думаю, работа ў такім шырокім фармаце дасць магчымасць удасканаліць барацьбу з карупцыяй такім чынам, каб гэта барацьба стала яшчэ больш плённай. Выказваем надзею на канструктыўнае ўзаемадзеянне", - сказаў генпракурор Расіі.

"Мы бачым савет як перспектыўную пляцоўку для міжнароднага ўзаемадзеяння. Беларусь паслядоўна выступае за пашырэнне міжнароднага супрацоўніцтва, павышэнне яго эфектыўнасці, кансалідацыю намаганняў у барацьбе са злачыннасцю ва ўсіх яе праявах", - адзначыў у час пасяджэння генеральны пракурор Беларусі Аляксандр Канюк.

"У 2015 годзе ў гэтай жа зале Выканкама СНД адбылося першае пасяджэнне Міждзяржсавета, у якім прынялі ўдзел прадстаўнікі толькі трох дзяржаў: Беларусі, Казахстана і Расіі. Прызнаўшы неабходнасць такога фармату ў рамках СНД, да Міждзяржсавета далучыліся Арменія і Кыргызстан, - адзначыў ён. - Мы адкрытыя і зацікаўлены ў сумеснай рабоце ў дасягненні канкрэтных вынікаў. Пасля размовы з генеральнымі пракурорамі шэрага краін СНД вельмі вялікую зацікаўленасць у далучэнні да гэтага савета выказвае Узбекістан. Вядома, мы будзем толькі рады гэтаму".

Аляксандр Канюк падкрэсліў, што цеснае ўзаемадзеянне краін Садружнасці ў сферы процідзеяння карупцыі дасць магчымасць мінімізаваць яе наступствы. "Якім шляхам ісці да гэтай мэты, кожная дзяржава вызначае самастойна, аднак вопыт суседзяў і партнёраў заўсёды ўяўляе асобую каштоўнасць. Ёсць магчымасць зблізіць падыходы, спрасціць узаемадзеянне дзяржаў-удзельніц. Мяркую, што прынятыя сёння рашэнні будуць садзейнічаць развіццю нашага супрацоўніцтва ў выпрацоўцы аднастайных падыходаў у сферы барацьбы з карупцыяй", - дадаў ён.

"Такія сустрэчы даюць магчымасць не толькі зверыць гадзіннікі па актуальных пытаннях, але і правесці мазгавы штурм, прыйсці да ўзгодненага меркавання аб шляхах вырашэння існуючых праблем. Беларускія праваахоўнікі заўсёды могуць абаперціся на калег з краін СНД, якія таксама могуць разлічваць на нашу дапамогу і падтрымку. Дзякуючы пастаяннаму дыялогу мы не стаім на месцы, удасканальваем і ўкараняем новыя формы работы", - дадаў старшыня Камітэта дзяржаўнай бяспекі Валерый Вакульчык.

Старшыня Следчага камітэта Іван Наскевіч выказаў упэўненасць, што правядзенне пасяджэння будзе садзейнічаць абмену вопытам, далейшаму сістэмнаму ўзгодненаму развіццю супрацоўніцтва краін СНД у мэтах забеспячэння скаардынаваных дзеянняў у сферы процідзеяння карупцыі, у паглыбленні і пашырэнні міжнароднага супрацоўніцтва дзяржаў Садружнасці.

Як чакаецца, сёння ў час пятага пасяджэння Міждзяржаўнага савета па процідзеянні карупцыі ўдзельнікі сустрэчы абмяркуюць дзесяць пытанняў, сярод якіх практыка барацьбы з карупцыяй у краінах СНД, удасканаленне міжнароднага супрацоўніцтва па вяртанні актываў, прадстаўленне інтарэсаў Міждзяржсавета на восьмай сесіі Канферэнцыі дзяржаў - удзельніц Канвенцыі ААН супраць карупцыі ў снежні ў Абу-Дабі. Акрамя таго, члены Міждзяржсавета падвядуць вынікі выканання рашэнняў папярэдняга пасяджэння, ацэняць рэалізацыю Міждзяржаўнай праграмы сумесных мер барацьбы са злачыннасцю і Канцэпцыі супрацоўніцтва краін Садружнасці ў процідзеянні карупцыі. На пасяджэнні таксама будуць абмяркоўвацца міжнародны маладзёжны конкурс сацыяльнай рэкламы "Разам супраць карупцыі!", шэраг іншых пытанняў.

Удзел у пасяджэнні прымаюць кіраўнікі антыкарупцыйных ведамстваў Арменіі, Беларусі, Казахстана, Кыргызстана, Расіі і Таджыкістана, а таксама прадстаўнікі Выканаўчага камітэта СНД.

Міждзяржаўны савет па процідзеянні карупцыі быў утвораны ў 2013 годзе. Яго членамі з'яўляюцца кіраўнікі ўпаўнаважаных кампетэнтных або спецыялізаваных органаў краін Садружнасці ў сферы процідзеяння карупцыі.-0-

Навіны рубрыкі Грамадства
Фота з архіва Белгідрамет расказаў аб экалагічнай абстаноўцы ў I паўгоддзі
Учора 19:34
Беларускія каманды адпраўляюцца на Армейскія міжнародныя гульні
Учора 18:40
У Беларусі ў І паўгоддзі пабудавана 19,3 тыс. кватэр, больш за трэць уведзенага жылля - для маючых патрэбу
Учора 18:02
Фота з архіва Цёплае надвор'е з дажджамі чакаецца ў Беларусі ў трэцяй дэкадзе ліпеня
Учора 15:13
Тэмпература паветра ў Беларусі ў I паўгоддзі была на 2,3 градуса вышэйшая за норму
Учора 15:02
У БДПУ на некаторыя спецыяльнасці конкурс дасягае 10 чалавек на месца
Учора 12:37
Зацверджана інструкцыя, якая вызначае паўнамоцтвы ДФР КДК у пытаннях карэкціроўкі падатковай базы
Учора 12:28
Міністэрства аховы здароўя прадаўжае работу па пераходзе галіны на новую сістэму аплаты працы з 2020 года
Учора 10:38
Пракуратура ўзяла на кантроль выкананне інвестпраграм па будаўніцтве сацыяльна значных аб'ектаў
Учора 09:42
Поўная версія