Поўная версія

Больш за 1 млн беларусаў прынялі ўдзел у перапісе насельніцтва па інтэрнэце

Грамадства 14.10.2019 | 12:34
Фота з архіва
Фота з архіва

14 кастрычніка, Мінск /Кар. БЕЛТА/. У перапісе насельніцтва, паводле даных на 9.00 14 кастрычніка, прынялі ўдзел 2 млн 753,3 тыс. беларусаў, з іх праз інтэрнэт перапісаліся 1 млн 73,9 тыс. чалавек, паведамілі БЕЛТА ў Нацыянальным статыстычным камітэце.

Доля тых, хто аддаў перавагу запаўненню анкеты анлайн, ад агульнай колькасці перапісаных складае цяпер 39 працэнтаў. З іх 60,2 працэнта - жыхары Мінска.

На першым этапе перапісу можна запоўніць апытальныя лісты самастойна праз інтэрнэт, на стацыянарным участку або нават на сваім працоўным месцы, калі арганізацыя выкарыстоўвае магчымасці мабільных участкаў. Карыстальнікі інтэрнэту могуць запоўніць анкету самастойна па адрасах www.перапіс.бел і www.census.by, выкарыстоўваючы пры гэтым рэсурс міжбанкаўскай сістэмы ідэнтыфікацыі. Гэта могуць зрабіць як зарэгістраваныя, так і незарэгістраваныя карыстальнікі МСІ. Першыя - увайшоўшы з дапамогай лагіна і пароля, другія - праз СМС-код (пазначыўшы свой ідэнтыфікацыйны нумар і нумар мабільнага тэлефона). Прайшоўшы працэдуру ўваходу, чалавек атрымае папярэдне запоўнены перапісны ліст, дзе ўжо будуць пазначаны прозвішча, імя, імя па бацьку, асабісты нумар, дата і месца нараджэння. Застанецца дапоўніць яго інфармацыяй, якой не хапае. Такім чынам можна перапісаць не толькі сябе, але і ўсю сваю сям'ю.

Для анлайн-перапісу выдзелены працяглы перыяд - з 4 па 18 кастрычніка. Паралельна працуюць мабільныя стацыянарныя ўчасткі па заяўках арганізацый.

З 4 кастрычніка пачалі працаваць стацыянарныя ўчасткі (усяго іх 644), на сайце Белстата размешчана інтэрактыўная карта з іх адрасамі, а таксама графікам работы. Гэтыя пункты будуць даступны ўвесь перыяд перапісу - да 30 кастрычніка.

Перапісчыкі ж выйдуць па адрасах пражывання рэспандэнтаў 21 кастрычніка.

Адна з галоўных задач перапісу - устанавіць дакладную колькасць насельніцтва краіны. Белстат разлічвае, што з выкарыстаннем усіх найноўшых навацый атрымаецца перапісаць максімальную колькасць людзей. На 1 жніўня ў Беларусі пражывала 9 млн 454,1 тыс. чалавек.-0-

Навіны рубрыкі Грамадства
Поўная версія