Поўная версія

Лукашэнка запатрабаваў павысіць дысцыпліну ў сельскай гаспадарцы і больш разлічваць на ўласныя сілы

Прэзідэнт 09.04.2019 | 11:51
У час рабочай паездкі
У час рабочай паездкі

9 красавіка, Лагойскі раён /Кар. БЕЛТА/. Прэзідэнт Беларусі Аляксандр Лукашэнка запатрабаваў павысіць узровень дысцыпліны ў сельскай гаспадарцы і разлічваць у большай ступені на ўласныя сілы. Аб гэтым кіраўнік дзяржавы заявіў сёння ў час рабочай паездкі ў Лагойскі раён, перадае карэспандэнт БЕЛТА.

"Наша бяда - псіхалогія. Аграрыі пачынаюць ныць: а вось нам цяжка. Дворнік (віцэ-прэм'ер. - Заўвага БЕЛТА) ходзіць, думае: так, сапраўды. Увайшоў у становішча. Трэба ім дапамагаць. Бяжыць да мяне, мяне пераконвае. Я таксама думаю: так, трэба дапамагаць. А ён сядзіць і рукі пацірае, пасмейваецца: вось я напружыў - мне далі. Усё, дурніца павінна быць скончана", - падкрэсліў Прэзідэнт.

Аляксандр Лукашэнка дэталёва цікавіўся перспектывамі развіцця сельгаспрадпрыемстваў у раёне, эфектыўнасцю іх работы. Асаблівы акцэнт кіраўнік дзяржавы зрабіў на адстаючых і стратных сельгасарганізацыях, якія неабходна прыводзіць у парадак. У гэтым плане ў краіне ёсць вопыт так званых падшэфных гаспадарак, якія перадаюцца ў кіраванне буйным вытворчым прадпрыемствам і арганізацыям. З наведвання адной з такіх гаспадарак (сельскагаспадарчы комплекс "Лагойскі" філіял РУП "Беларуснафта-Мінскаблнафтапрадукт") кіраўнік дзяржавы і пачаў рабочую паездку ў Лагойскі раён.

Паводле слоў Прэзідэнта, практычна ў кожным раёне краіны ёсць усяго адна-дзве адстаючыя або стратныя гаспадаркі, аднак вывесці іх на эфектыўную работу намаганнямі толькі мясцовай улады не заўсёды атрымліваецца і займае шмат часу. Пры гэтым размова нават не ідзе аб тым, што ад буйных прадпрыемстваў, якія ўжо маюць на балансе сельгасарганізацыі, спатрэбяцца значныя фінансавыя ўліванні. У першую чаргу неабходна перанясенне вопыту і тэхналогій эфектыўнага гаспадарання, павышэнне ўзроўню культуры земляробства. "Думаю, трэба каго-небудзь яшчэ дагрузіць дадаткова калгасамі, саўгасамі. Дапусцім, МТЗ або "Беларуснафту", - сказаў Аляксандр Лукашэнка. - У іх ёсць людзі, у іх нейкая маленькая капеечка ёсць, тэхналогіі, культура наогул іншая. Яны падцягнуць гэтыя гаспадаркі хутчэй. Але я хачу паглядзець, як яны спрацавалі з тымі калгасамі, якія ім некалі перадалі. "Беларуснафта", здаецца, нядрэнна працуе. І гэта гаспадарка адна з лепшых".

Прэзідэнт не супраць больш шырока падключэння да гэтай работы не толькі дзяржаўных, але і прыватных арганізацый. Развіццё такога ўзаемадзеяння з прыватнымі структурамі магчыма толькі ў выпадку іх эфектыўнай і плённай працы на зямлі, у тым ліку магчыма і далейшая перадача аб'ектаў ва ўласнасць.

У гэтым жа ключы размова вялася і ў час наведвання кіраўніком дзяржавы жывёлагадоўчага комплексу сельскагаспадарчага цэха "Гайна" Мінскага трактарнага завода і машыннага двара сельскагаспадарчага комплексу "Астрошыцы", які адносіцца да Мінскага камбіната хлебапрадуктаў. Акрамя абмеркавання практычных аспектаў у рабоце гаспадарак, іх вытворчых паказчыкаў, зноў абмяркоўвалася неабходнасць пашырэння практыкі замацавання стратных гаспадарак за буйнымі прамысловымі прадпрыемствамі. Напрыклад, для павышэння рэнтабельнасці вытворчасці малака ў сельгасцэху "Гайна" неабходна больш уласнага збожжа, а таму атрыманне дадатковых зямель якраз было б выгадна. "Я не гавару, што ад цябе патрэбны вялікія грошы. Нам ад цябе патрэбна арганізацыя, парадак. Я хачу хаця б па калгасе дагрузіць, калі пацягнеш. Калі не пацягнеш, ніхто табе даваць не будзе", - сказаў Аляксандр Лукашэнка, звяртаючыся да генеральнага дырэктара МТЗ Фёдара Дамаценкі.

Прэзідэнт асабліва акцэнтаваў увагу, што неабходна папярэдне прарэвізаваць пералік стратных сельгасарганізацый у краіне, якія будзе прапанавана дадаткова перадаць буйным прадпрыемствам, каб залішне не здымаць адказнасць і напружанне з мясцовых органаў улады.

У час рабочай паездкі кіраўніка дзяржавы ў Лагойскі раён падрабязна абмяркоўвалася тэма пасяўной, яе ход у розных рэгіёнах краіны. Віцэ-прэм'ер Беларусі Уладзімір Дворнік праінфармаваў кіраўніка дзяржавы аб сітуацыі з унясеннем угнаенняў. Паводле яго слоў, у гэтым годзе гаспадаркі краіны лепш забяспечаны мінеральнымі ўгнаеннямі, чым у мінулым - плюс 17 працэнтаў да ўзроўню 2018-га. У сувязі з гэтым Аляксандр Лукашэнка асабліва падкрэсліў, што дадатную дынаміку трэба абавязкова захаваць і ў далейшым. Прэзідэнт паставіў задачу, каб у наступным годзе ўзровень забяспечанасці мінеральнымі ўгнаеннямі быў не меншы за 110 працэнтаў да ўзроўню 2019 года. "Ні ў якім разе нельга падаць. Трэба, каб дынаміка была дадатная. Пастарацца трэба, каб 10 працэнтаў дабавіць да 2019 года. Мы разумеем, хто за гэта павінен адказваць. Першы віцэ-прэм'ер і прэм'ер сядзяць і лічаць грошы... Трэба напружвацца і шукаць гэтыя грошы, а рукамі разводзіць і гаварыць, што нельга - тады нічога і не будзе", - сказаў ён.

Прэзідэнт у сувязі з гэтым звярнуў увагу на неабходнасць максімальна выкарыстоўваць арганічныя ўгнаенні акрамя мінеральных, асабліва калі ў гаспадарках ёсць недахоп апошніх. Цяпер такі падыход актыўна выкарыстоўваецца ў Мінскай вобласці, што дае магчымасць не толькі забяспечыць ураджайнасць, але і сэканоміць сродкі на набыццё мінеральных угнаенняў, забяспечыць парадак на фермах. "Гэты вопыт абавязкова трэба выкарыстоўваць. Усё павінна быць па-гаспадарску", - сказаў Аляксандр Лукашэнка.

Асобныя даручэнні кіраўнік дзяржавы даў у частцы вырошчвання кармавых культур, якія неабходны ў жывёлагадоўлі. Яшчэ адно канкрэтнае даручэнне - пад'ём зябліва - узворванне палёў з восені для сяўбы яравых вясной. "У мінулым годзе ўжо, напэўна, пад націскам спрацавалі лепш па пад'ёме зябліва. Трэба паставіць сабе задачу з восені ўсё пераараць. Нельга вясной араць, самі разумееце, нават з пункту гледжання тэхналогіі. Таму трэба, каб з восені ўсё было пераарана. Гэта вопыт мінулых гадоў, тут ніякіх навацый няма, але мы ўсё гэта пачынаем пакрыху забываць. Там, дзе ў гаспадарках гэта не забываюць, там ёсць і ўраджай", - сказаў ён.

Аляксандру Лукашэнку таксама было даложана аб выкананні асноўных паказчыкаў сацыяльна-эканамічнага развіцця Мінскай вобласці. Старшыня Мінаблвыканкама Анатоль Ісачанка праінфармаваў, што па выніках студзеня-сакавіка прагназуецца выкананне ўсіх паказчыкаў. "Ідзе рост па ўсіх паказчыках, і ёсць дынаміка ў параўнанні з першым кварталам мінулага года", - сказаў губернатар.

На адным з палёў Аляксандру Лукашэнку прадэманстравалі новыя ўзоры сельскагаспадарчай тэхнікі. Асаблівую цікавасць у Прэзідэнта выклікала работа трактара МТЗ на электрычнай цязе. Ён аснашчаны не толькі традыцыйным дызельным рухавіком, але і электратрансмісіяй.

Як далажылі спецыялісты, такая трансмісія зручная ў практычнай рабоце. Аўтаматычна выбіраецца аптымальны рэжым рухавіка з мінімальным расходам паліва і максімальным ККД. Акрамя таго, трактар можа замяніць і электрастанцыю, калі на ферме раптам па нейкіх прычынах адбудуцца перабоі з электраэнергіяй.

Прэзідэнт даручыў дадаткова вывучыць магчымасці гэтага ўзору і перспектыўнасць яго далейшага выкарыстання, а таксама паставіў задачу прааналізаваць, ці магчыма наладзіць вытворчасць дэталей, кампанентаў і вузлоў, якія пакуль імпартуюцца. "Трэба паглядзець. Калі не ставіць задачу, нічога не зробяць. Я ўжо не раз праходзіў гэта ў краіне. Я часта ў якасці прыкладу "Паланэз" (рэактыўная сістэма залпавага агню (РСЗА) "Паланэз". - Заўвага БЕЛТА) прыводжу. Зрабілі. Усё можам. Варушыцца трэба", - сказаў ён.

У якасці эксперыментальнай пляцоўкі для новага трактара Прэзідэнт мае намер выкарыстоўваць і сваю прысядзібную гаспадарку.-0-

"Як быццам Парашэнка ў мяне сябар, а Зяленскі вораг" - Лукашэнка пракаменціраваў рэакцыю на яго заявы аб выбарах ва Украіне
"Я сказаў тое, што думаю. Калі ты не ведаеш, за каго галасаваць, - не галасуй. Навошта ты галасуеш, навошта рызыкуеш?" - адзначыў кіраўнік дзяржавы.

Навіны рубрыкі Прэзідэнт
Фота з архіва Лукашэнка: кантакты Беларусі і Латвіі садзейнічаюць умацаванню бяспекі і стабільнасці ў рэгіёне
Учора 18:49
Лукашэнка: Беларусь імкнецца да пашырэння дыялогу з Аманам на прынцыпах даверу і ўзаемаразумення
Учора 11:41
Лукашэнка мае намер наведаць Латвію ў першым-другім квартале 2020 года
17 Лістапад, 16:53
Лукашэнка аб намеры балаціравацца: я за гэта крэсла не трымаюся, але сваю кандыдатуру прапаную
17 Лістапад, 16:46
Лукашэнка: Беларусь заўсёды будзе заставацца ў сваіх межах, ні перад кім не поўзаючы на каленях
17 Лістапад, 16:33
Лукашэнка на выбарчым участку больш за гадзіну адказваў на пытанні журналістаў
17 Лістапад, 16:20
Лукашэнка: у мяне на стале ляжаць спісы дэпутатаў, якіх выберуць? Гэта смех
17 Лістапад, 16:04
Лукашэнка аб выніках у сельскай гаспадарцы: год быў не ідэальны, але добры
17 Лістапад, 15:19
Лукашэнка аб прызнанні выбараў: я наконт гэтага перажываць не прывык
17 Лістапад, 15:02
Поўная версія