16 жніўня, Мінск /Кар. БЕЛТА/. Прэзідэнт Беларусі Аляксандр Лукашэнка прадаўжае серыю рэгіянальных паездак па сельскагаспадарчай тэматыцы. У Смалявіцкім раёне Мінскай вобласці кіраўнік дзяржавы азнаёміцца з ходам палявых работ і праінспектуе сітуацыю ў насенняводстве, паведамляе БЕЛТА.
Прэзідэнт наведае селекцыйна-насенняводчы комплекс РУП "Навукова-практычны цэнтр НАН Беларусі па земляробстве". Аляксандру Лукашэнку даложаць аб ходзе палявых работ як у рэгіёне, так і Беларусі ў цэлым, асноўных выніках дзейнасці Нацыянальнай акадэміі навук Беларусі ў галіне земляробства, рабоце навукова-практычнага цэнтра па забеспячэнні сельскагаспадарчых арганізацый краіны сучаснымі айчыннымі сартамі збожжавых і кармавых культур.
Плануецца, што кіраўнік дзяржавы азнаёміцца з селекцыйнымі палямі па вывядзенні сартоў пшаніцы і зернебабовых культур, наведае вытворчы ўчастак навукова-практычнага цэнтра па дапрацоўцы насеннага матэрыялу.
У РУП "Навукова-практычны цэнтр НАН Беларусі па земляробстве" вядзецца работа па селекцыі 38 відаў сельскагаспадарчых раслін, вытворчасць арыгінальнага насення амаль 140 раяніраваных сартоў. У 2021 годзе на палях краіны вырошчваліся 176 сартоў сельскагаспадарчых культур селекцыі цэнтра, якія займалі больш як 80 працэнтаў пасяўных плошчаў, а айчынныя сарты азімага жыта, аўса, кармавога ячменю, грэчкі, яравой пшаніцы і лубіну - больш як 90 працэнтаў плошчаў. Усе зарэгістраваныя сарты цэнтра паспяхова канкурыруюць з лепшымі дасягненнямі замежнай селекцыі і маюць высокі ўзровень ураджайнасці і якасці прадукцыі: у збожжавых - больш за 100 ц/га, рапсу - 60, зернебабовых культур - да 50 ц/га.-0-
