Поўная версія
Рыгор Рапота

У Саюзнай дзяржаве прысутнічае тэндэнцыя пазітыву

Меркаванні 02.04.2019 | 18:54
Рыгор Рапота Рыгор Рапота Дзяржаўны сакратар Саюзнай дзяржавы

Нягледзячы на складанасці, што ўзнікаюць у адносінах Беларусі і Расіі, у Саюзнай дзяржаве прысутнічае тэндэнцыя пазітыву. Такое меркаванне выказаў дзяржсакратар Саюзнай дзяржавы Рыгор Рапота на прэс-канферэнцыі, прымеркаванай да Дня яднання народаў Беларусі і Расіі, перадае карэспандэнт БЕЛТА.

Рыгор Рапота нагадаў, што ў бягучым годзе спаўняецца 20 гадоў Дагавору аб стварэнні Саюзнай дзяржавы. "Любы працэс нараджаецца ў спрэчках, дыскусіях, сутыкненнях меркаванняў, і гэта нармальна - сказаў дзяржсакратар. - Галоўнае, што агульная тэндэнцыя станоўчая, і я гатовы гэта даказваць кожны дзень. Хачу пажадаць, каб гэта тэндэнцыя пазітыву, якая склалася паміж дзвюма краінамі, захоўвалася".

На яго думку, Саюзная дзяржава за 20 гадоў існавання прынесла станоўчыя вынікі ва ўсіх галінах і сферах. "Але я хацеў бы вылучыць тры напрамкі і паставіць іх у такім парадку, - прадоўжыў дзяржсакратар. - Першы, вядома, - гэта сацыяльная сфера, якая ахоплівае кола мерапрыемстваў, рашэнняў і дзеянняў, якія ствараюць камфортнае асяроддзе пражывання на ўсёй тэрыторыі Саюзнай дзяржавы для расіян і беларусаў. Гэта значыць ствараюць тыя ўмовы, калі расіяне могуць не адчуваць сябе іншаземцамі на тэрыторыі Беларусі, а беларусы могуць не адчуваць сябе іншаземцамі на тэрыторыі Расіі. Я не хачу сказаць, што там абсалютна ўсе пытанні вырашаны, але прагрэс відавочны".

У якасці другога напрамку Рыгор Рапота вылучыў эканамічную сферу. "Пэўныя дасягненні ў самай складанай тэме - эканамічнай, - канстатаваў ён. - Гэта тэма вызначаецца тым, што, па-першае, вялікі пласт нявырашаных задач, але і не менш вялікі пласт задач вырашаных. Гэта значыць захавана кааперацыя прамысловых прадпрыемстваў, захавана і ўзаемадзеянне, ёсць прагрэс у структуры тавараабароту, ёсць разуменне, куды мы можам рухацца далей, і ёсць апошнім часам асабліва прыкметныя тэндэнцыі больш глыбокага ўзаемадзеяння менавіта ў прамысловай сферы".

Трэцім напрамкам, у якім ёсць несумненныя дасягненні, Рыгор Рапота вылучыў пытанні ваенна-палітычнага супрацоўніцтва. "Пра іх мы менш за ўсё гаворым, напэўна, таму, што там і менш праблем, - сказаў ён. - Паміж ваеннымі дзвюх краін поўнае ўзаемаразуменне, па мэтах і задачах забеспячэння бяспекі Саюзнай дзяржавы таксама ёсць поўнае разуменне, нейкіх супярэчнасцей не назіраецца. З гэтай трэцяй пазіцыяй вельмі цесна звязаны ўзаемаадносіны ў знешнепалітычнай сферы".

Поўная версія