Поўная версія

Беларусь паслядоўна ўкараняе прынцыпы зялёнай эканомікі - Петрышэнка

Эканоміка 08.10.2019 | 14:18
Фота з архіва
Фота з архіва

8 кастрычніка, Мінск /Кар. БЕЛТА/. Беларусь паслядоўна ўкараняе прынцыпы зялёнай эканомікі. У бягучым годзе плануецца сфарміраваць Нацыянальную стратэгію ўстойлівага развіцця да 2035 года, дзе дакладна вызначаць прыярытэты і напрамкі маштабных пераўтварэнняў у эканамічнай, сацыяльнай і экалагічнай сферах. Аб гэтым паведаміў на адкрыцці італа-беларускага форуму па зялёнай эканоміцы намеснік прэм'ер-міністра Ігар Петрышэнка, перадае карэспандэнт БЕЛТА.

Прымаемыя меры дадуць магчымасць забяспечыць прагрэс у дасягненні Мэт устойлівага развіцця. У аснову пакладзена рэсурсаэфектыўная мадэль эканомікі, якая прадугледжвае зялёны вектар развіцця. Яна ўключае стварэнне экалагічна чыстых вытворчасцей, максімальнае выкарыстанне другаснай сыравіны.

Ігар Петрышэнка падкрэсліў, што гэтым пытанням з кожным годам удзяляецца ўсё больш пільная ўвага. Рэалізуюцца дзяржаўныя праграмы, удасканальваецца заканадаўства, распрацоўваюцца дакументы ў галіне аховы навакольнага асяроддзя і рацыянальнага прыродакарыстання. Ён нагадаў, што Беларусь у 2016 годзе стала 30-й краінай Парыжскага пагаднення аб змяненні клімату і прыняла абавязацельствы па скарачэнні выкідаў парніковых газаў.

"Прынцыпы зялёнай эканомікі для нас адносна новыя, але з улікам нацыянальных асаблівасцей і глабальных выклікаў дзяржава вызначае гэты напрамак як стратэгічны прыярытэт. Важнейшым сярэднетэрміновым дакументам у гэтай сферы з'яўляецца Нацыянальны план дзеянняў па развіцці зялёнай эканомікі. Беларусь стала другой краінай у СНД пасля Казахстана, якая прыняла такі дакумент на высокім узроўні", - адзначыў віцэ-прэм'ер.

Нацыянальны план дзеянняў прадугледжвае развіццё электратранспарту, рэалізацыю канцэпцыі "разумны горад", энергаэфектыўнае будаўніцтва, зніжэнне энергаёмістасці ВУП, выкарыстанне аднаўляльных крыніц энергіі, вытворчасць арганічнай прадукцыі, развіццё экалагічнага турызму і інш. У прыватнасці, у рэспубліцы актыўна рэалізуюцца праекты па выкарыстанні біярэсурсаў. Так, у Брэсце драўняныя адходы перапрацоўваюцца ў біяпаліва, у Барысаве з другасных рэсурсаў вырабляецца офісная папера, у Жыткавічах - высокаэфектыўныя арганічныя ўгнаенні.

Развіваецца сетка электразаправак. Іх ужо створана 125, у тым ліку 66 станцый хуткай зарадкі. Таксама ў краіне сталі часцей выкарыстоўвацца электробусы і электрапаязды. Напрыклад, у Мінску электрыфікавана 38,8 працэнта ад агульнай колькасці пасажырскага наземнага транспарту. У бягучым годзе закуплена 50 электробусаў, будуюцца тралейбусныя лініі ў новых мікрараёнах горада і трэцяя лінія мінскага метро.

Ігар Петрышэнка падкрэсліў, што Беларусь зацікаўлена ва ўкараненні зялёных тэхналогій і ў гэтым пытанні перспектыўным з'яўляецца супрацоўніцтва з італьянскімі дзелавымі коламі.

Італа-беларускі форум па зялёнай эканоміцы праводзіцца пасольствам Італіі ў Беларусі, гандлёвым агенцтвам (ІЧЕ), Беларускай гандлёва-прамысловай палатай і асацыяцыяй Confindustria Belarus. У ім прымаюць удзел прадстаўнікі дзяржаўных органаў, бізнес-асацыяцый, фінансавых інстытутаў, больш за 150 кампаній дзвюх краін.

На сустрэчы абмяркоўваюцца перспектывы пашырэння двухбаковага гандлёва-эканамічнага супрацоўніцтва ў галіне зялёнай эканомікі і іншых сферах з акцэнтам на выкарыстанні італьянскіх інвестыцый, магчымасці прымянення беларускімі кампаніямі перадавых дасягненняў італьянскай прамысловасці, выкарыстання аднаўляльных крыніц энергіі. Таксама ў цэнтры ўвагі будаўніцтва "разумных гарадоў", укараненне энергаэфектыўных тэхналогій у грамадзянскім і прамысловым будаўніцтве, сельскай гаспадарцы.-0-

Навіны рубрыкі Эканоміка
Поўная версія