Поўная версія

Тры спектаклі пакажуць у першы дзень тэатральнага форуму "М.@rt. кантакт"

Культура 21.03.2019 | 16:35

21 сакавіка, Магілёў /Сяргей Кулягін - БЕЛТА/. У Магілёве сёння стартуе ХIV Міжнародны маладзёжны тэатральны форум "М.@rt. кантакт", паведамляе карэспандэнт БЕЛТА.

На працягу тыдня будзе прадстаўлена 23 спектаклі тэатральных калектываў з 10 краін. А сёння пакажуць тры пастаноўкі: "Гэта мы" незалежнага тэатральнага праекта (Беларусь-Украіна), "За крапівой бераг" Брэсцкага акадэмічнага тэатра драмы імя Ленінскага камсамола Беларусі, а пасля ўрачыстага адкрыцця фестывалю - "Тарцюф" Санкт-Пецярбургскага тэатра "Майстэрня".

На цяперашні форум запрошаны калектывы, якія ўжо ярка праявілі сябе ў папярэднія гады, а таксама новыя тэатры і творчыя групы з Расіі, Літвы, Латвіі, Украіны, Польшчы, Ізраіля і іншых краін. Палітра праграмы вельмі яркая і актуальная, у ёй запланавана нямала творчых эксперыментаў. Своеасаблівым дэвізам тэатральнага свята стане "класіка і сучаснасць". "Гэта значыць у афішы шмат пастановак па класічных творах, у тым ліку паводле Альбера Камю, Вальтэра. Але нямала і знакавых сучасных тэкстаў", - расказаў дырэктар Магілёўскага абласнога драматычнага тэатра Андрэй Новікаў.

Гаспадары форуму, Магілёўскі аблдрамтэатр, прадставяць спектакль "Жоўты пясочак" у пастаноўцы маладога рэжысёра Камілі Хусаінавай паводле апавядання Васіля Быкава, а Магілёўскі абласны тэатр лялек пакажа прэм'еру "Кандыд, або Аптымізм" (паводле Вальтэра) у пастаноўцы галоўнага рэжысёра тэатра Ігара Казакова.

У час спецыяльнай праграмы пройдуць традыцыйныя майстар-класы для маладых акцёраў, а таксама на працягу фестывальнага тыдня будзе працаваць майстэрня маладой рэжысуры. Тэатральныя крытыкі вызначаць галоўную "Падзея форуму", лепшы спектакль выберуць па выніках глядацкага інтэрнэт-галасавання.

Праект стартаваў у 2006 годзе. За гэты час форум стаў адной з самых значных і чаканых культурных падзей не толькі ў Магілёве, але і ва ўсёй тэатральнай прасторы Беларусі. Геаграфія форуму шырокая. За гады правядзення фестывалю было паказана больш за 200 спектакляў з 21 краіны. Іх паглядзелі больш за 40 тыс. гледачоў. Заснавальнікамі форуму выступаюць Міністэрства культуры Беларусі, Магілёўскі абласны выканаўчы камітэт, упраўленне культуры аблвыканкама, Магілёўскі абласны драматычны тэатр.-0-

Навіны рубрыкі Культура
Поўная версія