12 сакавіка, Мінск /Кар. БЕЛТА/. Улады Венесуэлы далі амерыканскім дыпламатам 72 гадзіны на тое, каб пакінуць тэрыторыю краіны. Аб гэтым сёння паведаміў міністр замежных спраў Баліварыянскай Рэспублікі Хорхе Арэаса, інфармуе ТАСС.
Паводле слоў міністра, прысутнасць амерыканскіх дыпламатаў пагражае стабільнасці і міру ў Венесуэле.
Хорхе Арэаса таксама падкрэсліў, што Венесуэла спыняе перагаворы з ЗША аб адкрыцці секцый інтарэсаў у кожнай са сталіц. Магчымасць стварэння такіх секцый Каракас і Вашынгтон сталі абмяркоўваць пасля таго, як 24 студзеня прэзідэнт Венесуэлы Нікалас Мадура аб'явіў аб разрыве дыпадносін са Злучанымі Штатамі. У той жа час кіраўнік МЗС Венесуэлы выказаў зацікаўленасць у падтрыманні дыялогу з ЗША, але толькі на аснове ўзаемапавагі.
Дзяржсакратар ЗША Майкл Пампеа 11 сакавіка паведаміў аб тым, што Вашынгтон адклікае ўвесь астатні персанал з пасольства ў Венесуэле на працягу бягучага тыдня. Колькі амерыканскіх дыпламатаў да гэтага часу знаходзіцца ў Каракасе, не ўдакладняецца.
23 студзеня лідар венесуэльскай апазіцыі Хуан Гуайдо абвясціў сябе выконваючым абавязкі прэзідэнта краіны. У той жа дзень часовым кіраўніком дзяржавы яго прызналі ЗША, да іх далучыліся краіны Групы Лімы (за выключэннем Мексікі), Арганізацыя амерыканскіх дзяржаў, шэраг іншых краін. Дзеючы прэзідэнт Венесуэлы Нікалас Мадура назваў тое, што адбылося, спробай перавароту і заявіў аб разрыве дыпламатычных адносін з ЗША.-0-
