28 верасня, Мінск /Кар. БЕЛТА/. Інданезійскія ўлады вядуць пошук 400 турыстаў у раёне вулкана Баруджары, які напярэдадні, 27 верасня, пачаў вывяржэнне, паведамляюць інфармагенцтвы.
Большасць з турыстаў з'яўляюцца замежнымі грамадзянамі. Іх месцазнаходжанне пакуль невядома. На пошукі турыстаў накіраваны ратавальнікі, супрацоўнікі паліцыі і дабравольцы.
Вулкан Баруджары знаходзіцца на інданезійскім востраве Ламбок, яго вышыня дасягае 2,3 км. Баруджары 27 верасня выкінуў слуп попелу вышынёй 2 км. Улады краіны аб'явілі зону ў радыусе 3 км ад кратара вулкана забароненай для наведвання, а таксама эвакуіравалі амаль 1,1 тыс. чалавек.
Адзначаецца, што вулканічны попел можа стаць прычынай адмены дзясяткаў авіярэйсаў у аэрапорце Ламбока.-0-