17 студзеня, Мінск /Кар. БЕЛТА/. Нізкія тэмпературы паветра ў Польшчы прывялі да смерці 85 чалавек. Гэта агульная колькасць ахвяр марозу ў суседняй рэспубліцы з 1 лістапада 2016 года, паведамляюць інфармагенцтвы са спасылкай на ўрадавы цэнтр бяспекі.
"Толькі напярэдадні з-за пераахаладжэння загінулі два чалавекі, - інфармавала прэс-сакратар цэнтра Ганна Адамкевіч. - З пачатку лістапада ахвярамі халадоў сталі 85 чалавек".
Рэзкае пахаладанне прыйшло ў Польшчу ў першай палавіне студзеня. Асабліва нізкія тэмпературы назіраліся ў Малапольскім ваяводстве, дзе ўначы слупкі тэрмометраў апускаліся да мінус 37 градусаў па Цэльсію.
Паводле прагнозаў польскіх сіноптыкаў, у бліжэйшыя дні мінусавая тэмпература на большай частцы тэрыторыі краіны захаваецца.-0-