16 лістапада, Мінск /Кар. БЕЛТА/. Ранняя зімовая мяцеліца на паўночным усходзе ЗША і ў шэрагу цэнтральных раёнаў краіны стала прычынай гібелі васьмі чалавек, паведамляе амерыканская тэлекампанія CBS.
Два чалавекі загінулі ў выніку аварыі, калі ў штаце Місісіпі перавярнуўся турыстычны аўтобус. У штаце Арканзас зафіксавана тры выпадкі са смяротным канцом, адзін у штаце Індыяна, адзін у Агаё і адзін у Мэрылендзе.
Раней паведамлялася, што першая мяцеліца ў гэтым сезоне 15 лістапада паралізавала рух у Нью-Ёрку. Снегапад быў мацнейшы, чым прагназавалі ўсе метэаралагічныя службы. З-за снежнай буры былі паламаны галіны мноства дрэў, у выніку ў некаторых раёнах рух на дарогах быў перакрыты. Дрэннае надвор'е ўскладняла рух грамадскага транспарту. Жыхары Нью-Ёрка актыўна дзяліліся ў сацсетках фота і відэа снегападу і яго наступстваў.-0-