4 ліпеня, Масква /БЕЛТА - ТАСС/. Пажар у акумулятарным адсеку стаў асноўнай прычынай надзвычайнага здарэння з глыбакаводным апаратам, у выніку якога загінулі 14 падводнікаў. Аб гэтым міністр абароны Расіі Сяргей Шайгу паведаміў прэзідэнту РФ Уладзіміру Пуціну.
"Устаноўлена асноўная прычына здарэння - гэта пажар у акумулятарным адсеку", - прыводзяцца словы Сяргея Шайгу на сайце Крамля. Паводле слоў міністра, далей пажар атрымаў распаўсюджванне. Міністр далажыў Уладзіміру Пуціну аб тым, што пашкоджаны пажарам глыбакаводны апарат ВМФ падлягае аднаўленню. "Першая ацэнка - рамонт магчымы. У нашым выпадку не проста магчымы, а абавязковы", - сказаў Сяргей Шайгу. Ён удакладніў, што цяпер ацэньваюцца тэрміны, у якія можна будзе выканаць гэтыя работы.
Паводле слоў міністра, ядзерная энергетычная ўстаноўка на пацярпелым ад пажару падводным апараце цалкам ізалявана і ў рабочым стане.
У час сустрэчы з Сяргеем Шайгу Уладзімір Пуцін даручыў прадставіць экіпаж пацярпелага ад пажару глыбакаводнага апарата ВМФ да дзяржаўных узнагарод.
Як паведамлялася раней, у расійскіх тэрытарыяльных водах 1 ліпеня на навукова-даследчым глыбакаводным апараце, прызначаным для вывучэння прыдоннай прасторы і дна Сусветнага акіяна ў інтарэсах Ваенна-марскога флоту Расіі, у час правядзення біяметрычных вымярэнняў узнік пажар. 14 маракоў-падводнікаў загінулі ў выніку атручэння прадуктамі гарэння, сем з іх былі капітанамі 1-га рангу, тры - капітанамі 2-га рангу, два з'яўляліся героямі Расіі.-0-
