6 сакавіка, Мінск /Кар. БЕЛТА/. Сенат парламента амерыканскага штата Фларыда адобрыў пакет законапраектаў, накіраваных на прадухіленне стральбы ў школах, паведамляе ТАСС.
У прыватнасці, сенатары штата прагаласавалі за павышэнне з 18 гадоў да 21 года ўзроставага цэнзу пры куплі ўзбраенняў штурмавога ўзору. Адобрана забарона гандлю ўстройствамі, якія павышаюць скарастрэльнасць паўаўтаматычнай зброі.
Прынятыя законапраекты таксама пашыраюць паўнамоцтвы органаў правапарадку пры канфіскацыі ўзбраенняў і боепрыпасаў у людзей з псіхічнымі адхіленнямі і даюць магчымасць узмацніць меры бяспекі ў школах за кошт павелічэння колькасці аховы і дазволу некаторым настаўнікам мець пры сабе зброю.
Пасля адабрэння ў Сенаце пакет законапраектаў будзе ўнесены на разгляд у ніжнюю палату парламента Фларыды.
14 лютага ў школе гарадка Паркленд (штат Фларыда) 19-гадовы Нікалас Круз адкрыў стральбу, ахвярамі якой сталі 17 чалавек. Нікалас Круз раней быў выключаны з гэтай навучальнай установы за парушэнні дысцыпліны. У час бойні ён быў узброены паўаўтаматычнай вінтоўкай AR-15, якая выкарыстоўваецца амерыканскай паліцыяй і прадаецца ў паляўнічых магазінах. Паводле даных СМІ, ён змог легальна набыць зброю, нягледзячы на тое, што раней праходзіў лячэнне ў псіхіятрычнай клініцы.-0-
