11 ліпеня, Масква /БЕЛТА - ТАСС/. Расія гатова да перагавораў па Украіне ў любым фармаце, але сустрэча павінна быць прапрацавана, а ў Кіеве павінен быць сфарміраваны ўрад. Аб гэтым заявіў прэзідэнт РФ Уладзімір Пуцін, адказваючы на пытанні журналістаў аб яго рэакцыі на прапанову прэзідэнта Украіны Уладзіміра Зяленскага правесці сустрэчу з удзелам лідараў ФРГ, Францыі, ЗША і Вялікабрытаніі.
"Мы ніколі не адмаўляліся ні ад аднаго з прапанаваных фарматаў, у тым ліку ад расшырэння "нармандскага фармату", - сказаў Уладзімір Пуцін.
"Але, па-першае, гэты "нармандскі фармат" і сустрэча на вышэйшым узроўні павінны быць добра падрыхтаваны, гэта відавочна. Па-другое, больш ці менш аб нечым можна будзе гаварыць пасля канчатковага фарміравання новага ўрада Украіны і правядзення выбараў у парламент краіны. Па-трэцяе, я не ведаю, як рэагуюць на гэта запрашэнне іншыя ўдзельнікі прапанаванага фармату", - сказаў Уладзімір Пуцін.
"Мы ніколі не адмаўляліся ад кантактаў, калі яны ідуць на карысць. І гэта прапанова таксама можа быць цікавай", - адзначыў прэзідэнт РФ.
8 ліпеня прэзідэнт Украіны Уладзімір Зяленскі праз Facebook звярнуўся да прэзідэнта Расіі з прапановай сустрэцца ў Мінску пры пасрэдніцтве ЗША, Вялікабрытаніі, ФРГ і Францыі. "Хачу звярнуцца да прэзідэнта Расійскай Федэрацыі Уладзіміра Пуціна. Трэба пагаварыць..., - сказаў Уладзімір Зяленскі. - Кампанію для размовы прапаную наступную зрабіць: вы, я, прэзідэнт ЗША Дональд Трамп, прэм'ер Вялікабрытаніі Тэрэза Мэй, канцлер ФРГ Ангела Меркель, прэзідэнт Францыі Эмануэль Макрон. Думаю, Аляксандр Рыгоравіч Лукашэнка з задавальненнем прыме нас у Мінску". Прэзідэнт Беларусі Аляксандр Лукашэнка падтрымаў прапанову Зяленскага наконт арганізацыі ў Мінску міжнароднай сустрэчы.-0-
