16 ліпеня, Мінск /Кар. БЕЛТА/. Прэзідэнты Расіі і ЗША Уладзімір Пуцін і Дональд Трамп пачалі двухбаковыя перагаворы ў Гатычнай зале прэзідэнцкага палаца ў Хельсінкі. Аб гэтым паведамляе ТАСС.
Паведамляецца, што сустрэча пачалася амаль з гадзінным спазненнем. Першапачаткова планавалася, што расійскі лідар прыбудзе ў 13.00, а самі перагаворы стартуюць у 13.20.
Расійскі лідар першым прыбыў да месца правядзення сустрэчы. У Ружовым салоне палаца ён пакінуў запіс у кнізе ганаровых гасцей, а затым правёў некаторы час у пакоі чакання да прыезду Дональда Трампа.
Амерыканскі лідар прыбыў амаль праз 30 хвілін пасля Прэзідэнта Расіі. Лідары паціснулі адзін аднаму рукі. Затым абодва прэзідэнты прайшлі ў Гатычную залу, дзе пачаліся перагаворы.
Уладзімір Пуцін прызнаўся, што рады сустрэчы з амерыканскім калегам і мае намер абмеркаваць з ім адносіны паміж Расіяй і ЗША, а таксама сусветныя праблемы.
"У нас прадаўжаюцца пастаянныя кантакты - мы па тэлефоне гаварылі і сустракаліся некалькі разоў на пляцоўках розных міжнародных мерапрыемстваў. Але, вядома, надышоў час пагаварыць грунтоўна аб нашых двухбаковых адносінах і па розных вострых праблемах у свеце - іх даволі шмат", - сказаў кіраўнік расійскай дзяржавы на сустрэчы з Трампам.
Дональд Трамп са свайго боку заявіў, што мае намер абмеркаваць са сваім калегам пытанні гандлю, ваенных дзеянняў, а таксама ядзерных узбраенняў. Прэзідэнт ЗША выказаў надзею, што ў час саміту ўдасца знайсці адказы на пытанні, якія назбіраліся ў двухбаковых адносінах.
Размова Пуціна і Трампа пасля адкрытай для СМІ пратакольнай часткі прадоўжыцца за закрытымі дзвярамі. Як раней паведамлялася, пратаколам на гэта мерапрыемства адведзена паўтары гадзіны, аднак дакладнага абмежавання па часе няма.-0-
