6 сакавіка, Пекін /БЕЛТА - Сіньхуа/. Прэм'ер Дзяржаўнага савета КНР Лі Кэцян заклікаў фарсіраваць стварэнне дзяржавы інавацыйнага тыпу. Такі заклік прагучаў у час яго выступлення з дакладам аб рабоце ўрада на першай сесіі Усекітайскага сходу народных прадстаўнікоў (УСНП) 13-га склікання.
Лі Кэцян заявіў, што, прытрымліваючыся агульнага трэнду новай хвалі сусветнай навукова-тэхнічнай рэвалюцыі і радыкальных пераўтварэнняў у вытворчай сферы, неабходна ўсебакова ўвасабляць у жыццё стратэгію стымулявання развіцця за кошт інавацый, бесперапынна нарошчваць інавацыйны патэнцыял і канкурэнтаздольнасць эканомікі.
Прэм'ер Дзяржсавета адзначыў, што трэба інтэнсіфікаваць стварэнне дзяржаўнай сістэмы інавацый. Трэба паглыбіць фундаментальныя і прыкладныя фундаментальныя даследаванні, запусціць комплекс важнейшых праграм навукова-тэхналагічных інавацый, стварыць дзяржаўныя лабараторыі, якія будуць адпавядаць высокім стандартам. Неабходна заахвочваць прадпрыемствы, каб яны станавіліся ініцыятарамі рэалізацыі важнейшых навукова-тэхнічных праектаў, падтрымліваць узгодненую інавацыйную дзейнасць НДІ, ВНУ і прадпрыемстваў, паскараць укараненне рэзультатаў інавацыйнай дзейнасці.
Пры планаванні дзяржбюджэтных інвестыцый у навуку і тэхніку трэба аддаваць прыярытэт павышэнню дабрабыту насельніцтва, у прыватнасці, фарсіраваць вырашэнне складаных задач у сферы барацьбы са смогам, прафілактыкі і лячэння анкалагічных і іншых сур'ёзных захворванняў, каб навука і тэхналогіі ўсё больш служылі на карысць народа.
Трэба будзе рэфармаваць сістэму кіравання навукова-тэхнічнай дзейнасцю, пры ацэнцы яе рэзультатыўнасці і эфектыўнасці неабходна фарсіраваць перанос акцэнту з працэсу дзейнасці на яе рэзультаты.
Трэба надзяліць наватарскія калектывы і іх лідараў вялікімі правамі ў галіне кіравання кадрамі, фінансавымі і матэрыяльнымі рэсурсамі, а таксама пашырыць іх правы ў галіне прыняцця рашэнняў па тэхналагічных дарожных картах. Для навукова-тэхнічных работнікаў, якія адказваюць за вырашэнне важнейшых навукова-тэхнічных задач, будзе ўстаноўлена гібкая сістэма аплаты працы і заахвочвання. Варта прапрацаваць пытанне прадастаўлення вучоным і даследчыкам права ўласнасці на рэзультаты навукова-тэхнічнай дзейнасці і права на іх доўгатэрміновае выкарыстанне.
Усе ўстарэлыя нарматыўныя акты, якія супярэчаць стымуляванню інавацый, трэба неадкладна перагледзець або скасаваць; усе залішнія працэдуры, што перашкаджаюць вызваленню інавацыйнай энергіі, неабходна рашуча ануляваць.
Неабходна вывесці масавую прадпрымальніцкую і інавацыйную дзейнасць на новы ўзровень. У Кітаі ёсць вялікая колькасць чалавечых і кадравых рэсурсаў - гэта найлепшая "багатая руда", неабходная для развіцця інавацый. Трэба прадаставіць усебаковыя паслугі для прадпрымальніцкай і інавацыйнай дзейнасці, стымуляваць стварэнне ўзорна-паказальных баз для яе развіцця, заахвочваць буйныя прадпрыемствы, ВНУ і НДІ да адкрыцця доступу да інавацыйных рэсурсаў.
Таксама трэба фарміраваць архітэктоніку інавацыйнай і прадпрымальніцкай дзейнасці, якая характарызуецца спалучэннем анлайнавага і афлайнавага бізнесу, узаемадзеяннем вытворчых структур, ВНУ, НДІ і карыстальнікаў, інтэграцыяй буйных, сярэдніх і малых прадпрыемстваў, каб такім чынам павысіць узровень масавай прадпрымальніцкай і інавацыйнай дзейнасці. Неабходна стварыць дзяржаўны фонд для прадастаўлення фінансавых гарантый, падтрымліваць выхад на фондавы рынак лепшых прадпрыемстваў інавацыйнага тыпу, у маштабах усёй краіны распаўсюджваць пілотныя праекты па падатковых ільготах.
Трэба паглыбляць рэфармаванне сістэмы развіцця кадравага патэнцыялу, стымуляваць мабільнасць людскіх рэсурсаў. Падтрымліваць прадпрыемствы ў павелічэнні зарплаты кваліфікаваным рабочым, узмацніць меры заахвочвання высокакваліфікаваных спецыялістаў. Заахвочваць тых, хто навучаўся за мяжой, да вяртання ў Кітай з тым, каб яны займаліся інавацыйнай і прадпрымальніцкай дзейнасцю. З мэтай прыцягнення таленавітых замежных спецыялістаў варта пашыраць "зялёны калідор" у Кітай. Аб'яднаўшы розумы і сілы, Кітай абавязкова набярэ паскарэнне ў наватарскай сферы, падкрэсліў Лі Кэцян у дакладзе.-0-
