11 кастрычніка, Мінск /Кар. БЕЛТА/. Не менш як 10 чалавек загінулі ад паводак на іспанскім востраве Маёрка, адно дзіця лічыцца прапаўшым без вестак, паведаміла служба па надзвычайных сітуацыях Балеарскіх астравоў у Twitter.
Пацярпелыя ад паводак раёны наведаў старшыня ўрада Іспаніі Педра Санчэс, ён паабяцаў прыняць меры для нармалізацыі сітуацыі.
У выніку ўдару стыхіі больш за 200 чалавек былі эвакуіраваны, у некаторых населеных пунктах у школах адмянілі заняткі. Магутныя патокі вады змывалі аўтамабілі.
У зоне бедства працуюць ратавальнікі і ваенныя. Паводле даных СМІ, гэта самая вялікая колькасць ахвяр паводак у Іспаніі за апошнія 25 гадоў. Больш за ўсё пацярпелі муніцыпалітэты Сан-Ларэнса, Сон-Сервера, Арта, населены пункт Сільёт.-0-