4 кастрычніка, Мінск /Кар. БЕЛТА/. На датэрміновых парламенцкіх выбарах у Аўстрыі, якія прайшлі 29 верасня, перамагла кансерватыўная Аўстрыйская народная партыя (АНП), якую ўзначальвае былы канцлер краіны Себасцьян Курц, паведамляе нямецкая тэлерадыёкампанія Deutsche Welle.
Згодна з афіцыйнымі вынікамі выбараў, апублікаванымі 3 кастрычніка, АНП набрала 37,5 працэнта галасоў. Такім чынам, партыя Себасцьяна Курца атрымала нават больш галасоў, чым на папярэдніх выбарах 2017 года, дадаўшы 6 працэнтных пунктаў. На другім месцы - сацыял-дэмакраты з 21,2 працэнта галасоў, якія страчваюць 5,7 працэнтнага пункта. Для іх гэта горшы рэзультат у гісторыі партыі.
Следам ідзе правапапулісцкая Аўстрыйская партыя свабоды (АПС), якую падтрымалі 16,2 працэнта галасаваўшых грамадзян. Правапапулісты страцілі адразу 10 працэнтных пунктаў у параўнанні са сваім рэзультатам двухгадовай даўнасці. Следам ідуць аўстрыйскія "Зялёныя" з 13,9 працэнта і ліберальная "Новая Аўстрыя" - 8,1 працэнта галасоў.
Галоўнае пытанне па выніках галасавання ў тым, ці будзе зноў сфарміравана кіруючая кааліцыя пры ўдзеле АНП і АПС.
Раней пераходны ўрад на чале з першай жанчынай - канцлерам Аўстрыі Брыгітэ Бірляйн у адпаведнасці з Канстытуцыяй падаў прэзідэнту Аляксандру Ван дэр Белену прашэнне аб адстаўцы пасля датэрміновых выбараў у Нацыянальны савет (ніжняя палата парламента). Кіраўнік дзяржавы даручыў гэтаму ўраду часова выконваць абавязкі да фарміравання новага кабінета. Чакаецца, што ў бліжэйшы час Аляксандр Ван дэр Белен даручыць лідару палітычнай партыі весці перагаворы аб фарміраванні новага ўрада.-0-
