20 красавіка, Мінск /Кар. БЕЛТА/. Ратавальнікі знайшлі і паднялі на паверхню целы трох загінулых у выніку крушэння сухагруза "Героі Арсенала" ў раёне Керчанскай пераправы, перадае ТАСС.
Паводле слоў прадстаўніка ГУ МНС па Краснадарскім краі Мікіты Гаўрыляка, у выніку крушэння судна выратаваны адзін чалавек. Лёс васьмі чалавек застаецца невядомы. Усяго на борце судна знаходзілася 12 членаў экіпажа, з якіх дзевяць з'яўляюцца грамадзянамі Украіны.
Сігнал бедства ад сухагруза паступіў а 4-й гадзіне раніцы па мінскім часе 19 красавіка. Судна, паводле даных ратавальнікаў, на момант крушэння стаяла на рэйдзе. Месца крушэння судна знаходзіцца прыблізна за 27 км ад узбярэжжа Крыма.
Кіраўнік Рэспублікі Крым Сяргей Аксёнаў даручыў устанавіць бонавыя загароды ў раёне крушэння сухагруза "Героі Арсенала", каб не дапусціць забруджвання акваторыі Чорнага мора. Згодна з апошнімі данымі, у трумах сухагруза знаходзілася каля 19 т дызельнага паліва і амаль 1,5 т маторнага масла.
У прэс-службе ГУ МНС па Краснадарскім краі запэўнілі, што разліву нафтапрадуктаў на месцы крушэння сухагруза няма.
Турэцкая кампанія Gunes Shipping, якая з'яўляецца аператарам пацярпеўшага крушэнне ў Чорным моры сухагруза, адзначае, што судна знаходзілася ў вельмі добрым стане. Між тым шэраг турэцкіх аператараў заявілі, што сухагруз "Героі Арсенала" быў у нездавальняючым стане.
Па факце крушэння судна ў Керчанскім праліве ўзбуджана крымінальная справа па арт.263 КК РФ (парушэнне правіл бяспекі руху і эксплуатацыі чыгуначнага, паветранага, марскога і ўнутранага воднага транспарту).-0-
