16 жніўня, Мінск /Кар. БЕЛТА/. Колькасць ахвяр землетрасення, якое адбылося 5 жніўня на інданезійскім востраве Ламбок, дасягнула 460 чалавек, 7,7 тыс. чалавек атрымалі раненні, паведамляе інданезійскі партал Detik са спасылкай на Нацыянальнае агенцтва па барацьбе са стыхійнымі бедствамі.
Раней паведамлялася аб 436 загінулых і 1,3 тыс. пацярпелых.
Найбольшая колькасць загінулых зарэгістравана ў Паўночным Ламбоку - 396 чалавек. Не выключана, што колькасць ахвяр будзе расці. Ратавальнікі і пажарныя працягваюць разбор завалаў.
Улады адзначаюць, што эканамічны ўрон ад землетрасення яшчэ давядзецца ацаніць. Паводле папярэдніх даных, больш за 70 тыс. жылых дамоў было пашкоджана або разбурана. Часовыя месцы ў эвакуацыйных пунктах прадастаўлены 417 тыс. чалавек.
Як раней паведамлялася, пасольства Беларусі ў Інданезіі рэкамендавала беларускім грамадзянам устрымацца ад наведвання правінцыі Заходняя Нуса-Тэнгара (востраў Ламбок) да стабілізацыі абстаноўкі ў рэгіёне.-0-
