28 мая, Мінск /Кар. БЕЛТА/. Кандыдат ад правай партыі "Дэмакратычны цэнтр" Іван Дуке і экс-мэр сталіцы Калумбіі Густава Петра выходзяць у другі тур выбараў прэзідэнта Калумбіі, паведамляе ТАСС па выніках галасавання, апублікаваных Нацыянальным упраўленнем па запісы актаў грамадзянскага стану пасля апрацоўкі бюлетэняў з 99,19 працэнта ўчасткаў.
Паводле гэтых даных, за Дуке прагаласавалі 39,11 працэнта выбаршчыкаў. Яго асноўнага саперніка, які прадстаўляе левую кааліцыю "Прэзідэнт Петра", што аб'ядноўвае рух "Прагрэсісты" і Альтэрнатыўны індзейскі і грамадскі рух, падтрымалі 25,1 працэнта выбаршчыкаў.
Трэцяе месца ў першым туры заняў Серхіа Фахарда, які вылучаўся ад кааліцыі "Калумбія", у якую ўваходзяць партыі "Зялёны альянс", "Альтэрнатыўны дэмакратычны полюс" і палітычны рух "Грамадзянскі кампраміс". За яго прагаласавалі 23,77 працэнта выбаршчыкаў.
Згодна з калумбійскім заканадаўствам, для перамогі па выніках першага тура кандыдату неабходна набраць больш за палавіну галасоў. Правядзенне другога тура, у якім прымуць удзел два прэтэндэнты, якія заручыліся найбольшай падтрымкай выбаршчыкаў, запланавана на 17 чэрвеня.
Як адзначаюць наглядальнікі, ад таго, хто стане наступным прэзідэнтам Калумбіі, можа залежаць лёс мірнага пагаднення, якое ўрад рэспублікі заключыў з паўстанцамі з "Рэвалюцыйных узброеных сіл Калумбіі" (РУСК) у лістападзе 2016 года. Дуке неаднаразова заяўляў, што яно павінна быць зменена. У прыватнасці, ён лічыць, што былыя члены РУСК павінны быць прыцягнуты да адказнасці за парушэнні закона, учыненыя ў час узброенага канфлікту. Петра выступае за захаванне пагаднення.
Мір з РУСК паклаў канец крываваму канфлікту, які прадаўжаўся больш за паўстагоддзя і ў выніку якога загінулі звыш 250 тыс. чалавек. Групоўка поўнасцю раззброілася, на яе аснове быў створаны палітычны рух.-0-
