15 жніўня, Мінск /Кар. БЕЛТА/. Штраф для кампаніі Autostrade per l'Italia, якая займалася абслугоўваннем аўтамабільнага моста, што абваліўся каля італьянскага горада Генуя, можа скласці 150 млн еўра. Аб гэтым паведаміў на сваёй старонцы ў Facebook міністр транспарту і інфраструктуры Італіі Даніла Танінэлі.
Міністр заявіў, што былі дапушчаны сур'ёзныя парушэнні ва ўтрыманні моста. У сувязі з гэтым пасля трагедыі, што здарылася, кіраўніцтва Autostrade per l'Italia павінна падаць у адстаўку.
Даніла Танінэлі адзначыў, што італьянцы за карыстанне дарогамі плацяць вялікія грошы. Кампаніі, якія займаюцца абслугоўваннем дарог, зарабляюць мільярды, аднак не могуць выканаць неабходнага тэхнічнага абслугоўвання мастоў. "Калі яны не змогуць кіраваць нашымі аўтамагістралямі, гэта зробіць дзяржава", - сказаў ён.
Абрушэнне аўтамабільнага моста каля Генуі адбылося 14 жніўня. Як паведамляе брытанская служба навін ВПС са спасылкай на МУС Італіі, ахвярамі інцыдэнту сталі 38 чалавек, сярод іх трое дзяцей ва ўзросце 8, 12 і 13 гадоў. Яшчэ 16 чалавек атрымалі сур'ёзныя траўмы. Сотні чалавек былі эвакуіраваны з-за апасенняў, што могуць абваліцца астатнія часткі моста.
Пад заваламі могуць знаходзіцца ад 4 да 12 чалавек. Ратавальнікі працягваюць пошук выжылых, у пошукава-выратавальнай аперацыі ўдзельнічаюць каля 250 пажарных з усёй Італіі. У іх распараджэнні - спецыяльна абучаныя сабакі і скалалазнае абсталяванне.
У сувязі з трагедыяй у Італіі аб'яўлена двухдзённая жалоба.-0-
