15 лістапада, Мінск /Кар. БЕЛТА/. Брытанскі міністр працы і па справах пенсій Эстэр Маквей падала ў адстаўку, паведамляе ВВС.
Эстэр Маквей пакінула сваю пасаду, заявіўшы, што прадстаўлены прэм'ер-міністрам Тэрэзай Мэй праект пагаднення аб выхадзе Вялікабрытаніі з ЕС "не адпавядае рашэнню рэферэндуму".
У афіцыйным пісьме Тэрэзе Мэй Эстэр Маквей заявіла, што ўмовы пагаднення звяжуць рукі не толькі дзеючаму брытанскаму ўраду, але і ўсім наступным, пазбавіўшы іх магчымасці ажыццяўляць незалежную ад ЕС эканамічную палітыку. Паводле слоў Эстэр Маквей, прыняты дакумент таксама пагражае цэласнасці Злучанага Каралеўства, у сувязі з чым яна не можа яго падтрымаць.
У знак пратэсту супраць прапанаванага Тэрэзай Мэй праекта Brexit сёння таксама падалі ў адстаўку міністр па справах Brexit Дамінік Рааб і дзяржаўны сакратар брытанскага міністэрства па справах Паўночнай Ірландыі Шайлеш Вара. Весткі аб адстаўцы Дамініка Рааба справакавалі зніжэнне курса брытанскага фунта.-0-