21 жніўня, Мінск /Кар. БЕЛТА/. Былы кіраўнік ваеннага савета Судана генерал Абдэль Фатах аль-Бурхан прыняў прысягу ў якасці кіраўніка Суверэннага савета, паведамляе Reuters.
Цырымонія прывядзення да прысягі прайшла сёння ў прэзідэнцкім палацы ў Хартуме.
20 жніўня ў Судане завяршылася фарміраванне Суверэннага савета ў складзе 11 членаў, які будзе кіраваць краінай на працягу трохгадовага пераходнага перыяду да выбараў. Згодна з дамоўленасцю паміж ваеннымі і апазыцыяй, Суверэнны савет з'яўляецца вышэйшым органам улады ў краіне. Пяць яго членаў выбраны сярод грамадзянскіх асоб і пяць сярод ваенных. Кандыдатуру адзінаццатага члена ваенныя і апазіцыя выбіралі сумесна.
Новы орган кіравання заменіць пераходны ваенны савет, які кіраваў Суданам пасля звяржэння ў красавіку прэзідэнта Амара аль-Башыра.-0-
