7 жніўня, Мінск /Кар. БЕЛТА/. У штаб-кватэры УЕФА ў Ньёне (Швейцарыя) адбылася жараб'ёўка плэй-оф кваліфікацыі футбольнай Лігі чэмпіёнаў, паведамляе карэспандэнт БЕЛТА.
Па яе выніках барысаўскі БАТЭ ў выпадку поспеху ў двухраўндавым процістаянні з азербайджанскім "Карабахам" згуляе з галандскім ПСВ з Эйндхавена.
Іншыя патэнцыяльныя пары плэй-оф кваліфікацыі абяцаюць падарыць некалькі цікавых процістаянняў. Лепшая каманда ў паядынках партугальскай "Бенфікі" і "Фенербахчэ" (Турцыя) згуляе з пераможцам у матчах "ПАОК" (Грэцыя) і маскоўскага "Спартака". Лепшы ў сустрэчах кіеўскага "Дынама" беларускага трэнера Аляксандра Хацкевіча і пражскай "Славіі" згуляе з пераможцам у матчах "Стандард" (Бельгія) - "Аякс" (Нідэрланды).
Пераможца пары "Црвена Зорка" (Сербія) - "Спартак" (Трнава, Славакія) згуляе з пераможцам у процістаянні "Зальцбург" (Аўстрыя) - "Шкендыя" (Македонія). Швейцарскі "Янг Бойз" сустрэнецца з лепшай камандай у процістаянні "Астана" (Казахстан) і заграбскага "Дынама". Пераможцу ў дуэлі "Мальмё" (Швецыя) - "Відзі" (Венгрыя) давядзецца сустрэцца з лепшым клубам пары "Селтык" (Шатландыя) - АЕК (Грэцыя).
Матчы плэй-оф пройдуць 21-22 і 28-29 жніўня. Шэсць лепшых каманд выйдуць у асноўны раўнд турніру.
У групавую стадыю Лігі чэмпіёнаў сезона-2018/2019 без кваліфікацыі выйшлі 26 клубаў з найбольш высокім рэйтынгам: "Барселона", "Атлетыка", мадрыдскі "Рэал", "Валенсія" (усе - Іспанія), "Баварыя", "Шальке-04", "Хофенхайм", дортмундская "Барусія" (усе - Германія), "Манчэстэр Сіці","Манчэстэр Юнайтэд", "Тотэнхэм", "Ліверпуль" (усе - Англія), "Ювентус", "Напалі", "Рома", "Інтэр" (усе - Італія), "ПСЖ", "Манака", "Ліён" (усе - Францыя), "Лакаматыў", ЦСКА (абодва - Расія), "Порту" (Партугалія), "Шахцёр" (Украіна), "Брюге" (Бельгія), "Галатасарай" (Турцыя), "Вікторыя Плзень" (Чэхія).
Групавы этап Лігі стартуе 18 верасня і завершыцца 12 снежня. Фінал самага прэстыжнага клубнага футбольнага турніру адбудзецца 1 чэрвеня 2019 года на стадыёне "Метрапалітана" ў Мадрыдзе. Дзеючым пераможцам турніру з'яўляецца мадрыдскі "Рэал", які 26 мая на стадыёне "Алімпійскі" ў Кіеве абыграў з лікам 3:1 англійскі "Ліверпуль".
Барысаўскі БАТЭ прыбыў ужо ў Баку, дзе 7 жніўня яму давядзецца правесці першы матч 3-га кваліфікацыйнага раўнда Лігі чэмпіёнаў з "Карабахам". На гэты паядынак, паводле паведамленняў азербайджанскіх СМІ, прададзена ўжо больш за 15 тыс. білетаў. Гульня ў адказ пройдзе 14 жніўня ў Барысаве.-0-
