11 лютага, Мінск /Кар. БЕЛТА/. Тэнісісткі зборнай Беларусі ў паўфінале Кубка Федэрацый сустрэнуцца з камандай Аўстраліі на яе пляцоўцы, паведамляе карэспандэнт БЕЛТА.
Беларускі ў чвэрцьфінальным матчы абыгралі ў Браўншвейгу Германію з сухім лікам 4:0, а аўстралійкі таксама на выездзе адолелі амерыканак - 3:2. Паўфінальная сустрэча пройдзе 20-21 красавіка ў Аўстраліі. Зборныя Беларусі і Аўстраліі яшчэ ні разу не сустракаліся ў матчах Кубка Федэрацый.
Другой паўфінальнай парай сталі зборныя Францыі і Румыніі. Французскія тэнісісткі ў 1/4 фіналу перамаглі на выездзе Бельгію - 3:1, а румынкі таксама ў гасцях перайгралі чэшскую каманду з лікам 3:2.
Пераможцы паўфіналаў 9-10 лістапада сустрэнуцца ў вырашальным матчы Кубка Федэрацый.-0-