2 мая, Мінск /Кар. БЕЛТА/. Склад хакейнага клуба "Дынама-Мінск" папоўніў 21-гадовы расійскі форвард Арцём Арцёмаў, паведамілі БЕЛТА ў прэс-службе мінскай каманды.
Ігрок падпісаў двухбаковы кантракт на адзін год. Ураджэнец Петрапаўлаўска-Камчацкага ў юныя гады выступаў за некалькі маскоўскіх школ і лічыўся адным з найбольш таленавітых ігракоў свайго ўзросту ў Расіі. Арцёмаў прыцягваўся ў зборную Расіі да 16 гадоў, а таксама разглядаўся ў якасці аднаго з кандыдатаў на паездку на маладзёжны чэмпіянат свету 2016 года ў складзе расійскай дружыны, але так і не згуляў ніводнага афіцыйнага матчу.
У 2013 годзе Арцём Арцёмаў адправіўся за акіян, дзе выступаў у складзе Chicago Steel (USHL) і набраў 33 (16+17) ачкі ў 56 матчах. На наступны сезон расіянін перайшоў у Saginaw Spirit (OHL), дзе ў першы год бліснуў рэзультатыўнасцю - 35 (16+19) балаў у 71 сустрэчы, а на другі год змог паказаць яшчэ больш высокі рэзультат - 56 (19+37) балаў у 71 матчы.
У сезоне 2016/17 Арцёмаў падпісаў кантракт з новасібірскай "Сібір'ю". Аднак замацавацца ў складзе гэтага клуба КХЛ форварду не ўдалося. За два сезоны ён адыграў у аснове сібіракоў усяго 41 матч.-0-