12 чэрвеня, Масква /Кар. БЕЛТА/. Міжнародны дзіцячы сацыяльны праект "Футбол для дружбы" стартаваў у Маскве, перадае карэспандэнт БЕЛТА.
Чэмпіянат па футболе сярод дзяцей з розных краін свету ва ўзросце 12 гадоў пачаўся кваліфікацыйнымі матчамі. Усяго сфарміраваны 32 міжнародныя зборныя - па 4 каманды ў кожнай падгрупе. Пераможцы па выніках усіх матчаў згуляюць вечарам у фінале.
Беларусь на чэмпіянаце прадстаўляе Ксенія Яцыновіч з Маладзечна. Беларуская ўдзельніца гуляе на пазіцыі абаронцы ў камандзе "Арангутангі". Кампанію Ксеніі склалі аднагодкі з Грузіі, Лесота, Індыі, Папуа - Новай Гвінеі і Сейшэльскіх астравоў.
Матчы праходзяць у "Сапсан Арэне" - базавым стадыёне расійскага футбольнага клуба "Лакаматыў".
Фінальныя мерапрыемствы праграмы "Футбол для дружбы" прымеркаваны да чэмпіянату свету па футболе-2018 у Расіі. У праграму мерапрыемстваў уваходзяць запуск экалагічных маршрутаў, міжнародны лагер дружбы, міжнародны дзіцячы форум, наведванне матчу-адкрыцця ЧС па футболе. У праекце прымаюць удзел 1,5 тыс. дзяцей і дарослых. "Футбол для дружбы" асвятляюць больш за 5 тыс. вядучых СМІ з усяго свету.
Праграма "Футбол для дружбы" стартавала ў 2013 годзе. За мінулыя гады ў праекце прынялі ўдзел амаль 4 тыс. хлопчыкаў і дзяўчынак, якіх падтрымліваюць ФІФА, УЕФА, Міжнародны алімпійскі камітэт, нацыянальныя футбольныя федэрацыі і клубы, а таксама дабрачынныя фонды.-0-