13 кастрычніка, Мінск /Кар. БЕЛТА/. Мінская "Сталіца" атрымала другую перамогу на дамашнім адборачным турніры Кубка УЕФА па міні-футболе і выйшла ў элітны раўнд кваліфікацыі, паведамляе карэспандэнт БЕЛТА.
У другім туры спаборніцтваў кваліфікацыйнай групы 1 у мінскім палацы спорту "Уручча" чэмпіёны Беларусі ўзялі верх над італьянскай "Пескарай" з лікам 6:4. Гаспадары вырашылі згуляць другім нумарам, і гэта тактыка прынесла ім поспех. Госці з Італіі больш валодалі мячом, шмат атакавалі, але добра згуляў галкіпер мінчан Дзмітрый Палякоў, які не раз выратоўваў каманду ад гола. Па два мячы ў складзе мінчан забілі Марэна і Тарас Каралішын, па разе вызначыліся Мікалай Грыцына і Ігар Шчэрбіч. У першым матчы падапечныя Андрэя Толмача перайгралі маскоўскае "Дынама" - 5:3.
У заключны дзень спаборніцтваў, 14 кастрычніка, "Сталіца" і казахстанскі "Кайрат" у вочнай сустрэчы вызначаць пераможцу квартэта. Госці з Алматы таксама маюць у сваім актыве дзве вікторыі - над "Пескарай" з лікам 5:1 і "Дынама" - 7:2. Каманды з Італіі і Расіі ў суботнім паядынку вызначаць уладальніка трэцяй пуцёўкі ў элітны раўнд адбору.
Турнірнае становішча перад заключным турам: "Кайрат" - 6 ачкоў (розніца мячоў - 12-3), "Сталіца" - 6 (11-7), "Пескара" - 0 (5-11), "Дынама" - 0 (5-12).-0-
