12 верасня, Мінск /Кар. БЕЛТА/. Мінскі хакейны клуб "Юнацтва" ў першай гульні чэмпіянату Беларусі пад кіраўніцтвам новага галоўнага трэнера Аляксандра Макрыцкага ўступіў "Дынама-Маладзечна" з лікам 1:4 (1:1, 0:2, 0:1), паведамляе карэспандэнт БЕЛТА.
Гульня, якую наведаў трэнерскі штаб мінскага "Дынама" на чале з Крэйгам Вудкрафтам, пачалася пад дыктоўку мінчан: Дзмітрый Жалняроўскі адкрыў лік на 4-й мінуце сустрэчы. Аднак утрымаць перавагу "Юнацтва" не змагло, маладзечанцы адыграліся яшчэ да перапынку - намаганні партнёраў завяршыў Аляксандр Зубрыцкі.
У другім перыядзе падапечныя Дзмітрыя Краўчанкі прымусілі капітуляваць галкіпера "Юнацтва" Ігара Брыкуна яшчэ двойчы - пасля дакладных кідкоў Аляксандра Зубрыцкага, які зрабіў дубль, і Мікалая Сытога.
Нягледзячы на намаганні сталічных хакеістаў, якія імкнуліся выраўнаваць сітуацыю на пляцоўцы ў заключнай трэці прынцыповага паядынку, маладзечанцы давялі лік да максімальнага. Заключную шайбу ў матчы закінуў нападаючы "Дынама-Маладзечна" Вячаслаў Лісічкін.
У жніўні каманды сустракаліся ў фінале Кубка Салея. Шматразовы чэмпіён Беларусі "Юнацтва" быў мацнейшы за сапернікаў з "Дынама-Маладзечна" (3:2) і шосты раз выйграў ганаровы трафей.
Напярэдадні Міхаіл Захараў пакінуў пасаду настаўніка "Юнацтва" і засяродзіў увагу на рабоце з нацыянальнай зборнай.-0-