18 лютага, Пхёнчхан /Кар. БЕЛТА/. Хакеісты зборных Швецыі і Канады сталі ўладальнікамі апошніх прамых пуцёвак у чвэрцьфінальны раўнд мужчынскага хакейнага турніру зімовых Алімпійскіх гульняў у Пхёнчхане, паведамляе карэспандэнт БЕЛТА.
Сёння ў драматычным матчы лідараў групы С папярэдняга раўнда зборная Швецыі перамагла сапернікаў з Фінляндыі 3:1 (1:0, 0:1, 2:0), што дазволіла заняць першае месца ў сваім квартэце і атрымаць прамы пропуск у чвэрцьфінал. Шведскі галкіпер мінскага "Дынама" Юнас Энрат сёння на лёд у складзе сваёй алімпійскай дружыны не выходзіў. Ён застаўся ў запасе.
У групе А каманда Канады не пакінула шанцаў апанентам з Рэспублікі Карэя - 4:0 (1:0, 1:0, 2:0). Канадцы таксама кваліфікаваліся непасрэдна ў чвэрцьфінальную стадыю, стаўшы па дадатковых паказчыках лепшай са зборных, што занялі другія месцы ў трох групах.
Становішча каманд у групах пасля трох матчаў папярэдняга раўнда выглядае так:
А: Чэхія - 8 ачкоў, Канада - 7, Швейцарыя - 3, Рэспубліка Карэя - 0;
В: алімпійскія атлеты з Расіі - 6, Славенія - 4, ЗША - 4, Славакія - 4;
С: Швецыя - 9, Фінляндыя - 6, Германія - 2, Нарвегія - 1.
Такім чынам, непасрэдна ў чвэрцьфінал кваліфікаваліся зборныя Чэхіі, Канады, Швецыі і каманда алімпійскіх атлетаў з Расіі.
Вызначаны і пары, якія сустрэнуцца ў плэй-оф (1/8 фіналу): Швейцарыя - Германія, Фінляндыя - Рэспубліка Карэя, ЗША - Славакія і Славенія - Нарвегія. Далей у чвэрцьфінале каманда-пераможца з першай пары згуляе са шведамі, з другой - з канадцамі, з трэцяй - з чэхамі, з чацвёртай - з расіянамі.
Матчы 1/8 фіналу адбудуцца 20 лютага. Чвэрцьфіналы пройдуць 21 лютага, паўфіналы - 23 лютага. Няўдачнікі паўфінальных сустрэч 24 лютага паспрачаюцца за алімпійскую бронзу, а пераможцы 25 лютага згуляюць у паядынку за чэмпіёнскі тытул.-0-
