4 снежня, Мінск /Кар. БЕЛТА/. Юнацкія зборныя Беларусі (U-16) сталі прызёрамі праведзенага ў Мінску XXI Міжнароднага баскетбольнага турніру памяці першага міністра спорту і турызму, кіраўніка Нацыянальнага алімпійскага камітэта Беларусі Уладзіміра Рыжанкова, паведамляе карэспандэнт БЕЛТА.
У спаборніцтвах дзяўчат зборная Беларусі, якая выступала пад кіраўніцтвам Надзеі Камянец і Андрэя Ваўлева, уступіла равесніцам з Польшчы з лікам 66:79 і заняла другое месца ўслед за полькамі. Бронза ў каманды Літвы, баскетбалісткі з Санкт-Пецярбурга занялі чацвёртае месца. У мужчынскім турніры беларускія баскетбалісты пад кіраўніцтвам Мікалая Аляксеева занялі трэцяе месца, уступіўшы ў заключным паядынку польскай камандзе - 53:76. Перамаглі баскетбалісты Літвы, другое месца ў каманды Польшчы, малдаване фінішавалі чацвёртымі.
Па выніках спаборніцтваў лепшымі ігракамі прызнаны Ёна Кабылінска (Польшча) і Мантас Рэпсіс (Літва).
Спецыяльныя прызы атрымалі таксама лепшыя баскетбалісты ў гульнявых амплуа: абаронцы - Ягор Юр'еў (Беларусь), Алісія Рагазінска (Польшча), нападаючыя Каспер Клачак (Польшча), Сімона Віскаскайтэ (Літва), цэнтравыя Камеліус Зікас (Літва), Эмілія Яблонска (Польшча). Самымі рэзультатыўнымі ігракамі турніру сталі Каспер Гордан (Польшча) і Ірына Венская (Беларусь).
Узнагароды будучым зоркам баскетбола ўручылі сын Уладзіміра Рыжанкова першы намеснік кіраўніка Адміністрацыі Прэзідэнта, старшыня Беларускай федэрацыі баскетбола Максім Рыжанкоў, галоўны трэнер нацыянальных каманд Анатоль Якубенка і кіраўнік групы кампаній VimUnion Уладзімір Мядзведзеў.
Першы турнір прайшоў у 1996 годзе. Арганізатарамі цяперашніх спаборніцтваў сталі Міністэрства спорту і турызму, НАК, Беларуская федэрацыя баскетбола, Мінгарвыканкам, ДУ "Белспортзабеспячэнне".-0-