9 лістапада, Мінск /Кар. БЕЛТА/. Хакейны клуб "Дынама-Мінск" выставіў абаронцу Ілью Хахлова на драфт адмоў, а нападаючы Арцём Арцёмаў адпраўлены ў фарм-клуб - салігорскі "Шахцёр", паведамілі БЕЛТА ў прэс-службе каманды.
Кіраўніцтва каманды не задавольваюць паказчыкі ігракоў у бягучым сезоне. Арцём Арцёмаў выходзіў на лёд у дзевяці паядынках, набранымі ачкамі не адзначыўся, зарабіў каэфіцыент карыснасці "-1". Ілья Хахлоў правёў 20 матчаў, аддаў адну рэзультатыўную перадачу. Яго паказчык карыснасці "-9".
Згодна з артыкулам 39 Прававога рэгламенту КХЛ ігрок, змешчаны ў спіс адмоў, на працягу 48 гадзін можа быць выбраны іншым клубам лігі.-0-