10 кастрычніка, Мінск /Кар. БЕЛТА/. Хакеісты "Юнацтва" пацярпелі паражэнне ў выязным матчы ад фінскага ТПС у Лізе чэмпіёнаў з лікам 1:3, паведамляе карэспандэнт БЕЛТА.
Фінская каманда намаганнямі Оскары Сікі і Ілары Філпулы ўжо да пачатку другога перыяду вяла 2:0. У беларускай каманды дакладным кідком вызначыўся на 34-й хвіліне Міхаіл Стэфановіч. Шанц зраўнаваць лік падапечныя Міхаіла Захарава мелі ў сярэдзіне трэцяга перыяду, атрымаўшы колькасную большасць. Аднак частыя памылкі мінчан не дазволілі ім перавесці гульню ў авертайм.
Да сустрэчы з ТПС мінчане атрымалі дамашнюю вікторыю над шведскім "Мальмё" - 6:2, а таксама двойчы ўступілі нямецкаму клубу "Рэд Бул Мюнхен" - 3:4 (у гасцях) і 0:3 (дома).
Турнірнае становішча: "Рэд Бул Мюнхен" - 9 ачкоў, "Мальмё" - 9, ТПС-6, "Юнацтва" - 3.
Іншы беларускі прадстаўнік у Лізе чэмпіёнаў гродзенскі "Нёман" правядзе свой паядынак 10 кастрычніка і згуляе ў гасцях з нямецкім "Айсберанам" з Берліна.-0-
