28 верасня, Мінск /Кар. БЕЛТА/. Брэсцкі гандбольны клуб імя Мяшкова займае другое месца ў турнірнай табліцы SEHA-лігі, паведамляе карэспандэнт БЕЛТА.
Свой пяты паядынак у гэтым міжнародным турніры падапечныя Сяргея Бябешкі праводзілі ў славацкім Прэшаве супраць мясцовага "Татрана" і дабіліся перамогі з лікам 30:25 (14:10). На працягу амаль усёй сустрэчы брастаўчане кантралявалі ход гульні, толькі ў пачатку другой палавіны гаспадары змаглі выйсці наперад. Аднак у рашаючыя мінуты мяшкоўцы зноў выйшлі ў лідары і заслужана выйгралі з перавагай 5 мячоў. Самым рэзультатыўным у складзе пераможцаў стаў латвійскі легіянер Дайніс Крыштопанс, які 7 разоў паражаў вароты "Татрана".
У другіх матчах гэтага тура аўтсайдар спаборніцтваў баснійскі "Ізвіджач" на сваёй пляцоўцы ўступіў харвацкаму "Заграбу" з лікам 26:28, македонскі "Металург" у Скоп'і згуляў унічыю з гаспадарамі з харвацкага "Нексэ" - 25:25.
Сёння лідар турніру македонскі "Вардар" прыме ў сябе дома славенскі "Цэле". Славенская дружына будзе наступным сапернікам БГК - іх сустрэча адбудзецца 12 кастрычніка ў брэсцкім спарткомплексе "Вікторыя".
Становішча ў групе лідараў SEHA-лігі цяпер такое: "Вардар" - 16 ачкоў (6 матчаў), БГК - 10 (5), "Заграб" - 9 (4), "Веспрэм" (Венгрыя) - 9 (4), "Цэле" - 9 (5).
Хутка гандбалісты БГК правядуць свае чарговыя матчы ў групе В галоўнага кантынентальнага турніру - Лігі чэмпіёнаў. У першы дзень кастрычніка чэмпіёны Беларусі згуляюць у Скоп'і супраць "Вардара", а 8 кастрычніка прымуць на сваёй арэне нямецкі "Райн Левен". У стартавым туры групавога этапу чэмпіёнскай Лігі брастаўчане ў сябе дома прайгралі дзеючаму пераможцу польскаму "Вівэ" з лікам 24:29. Вынікі астатніх гульняў першага тура В: "Цэле" - "Заграб" - 30:28, "Крыстыянстад" (Швецыя) - "Вардар" - 23:28, "Пік" (Венгрыя) - "Райн Левен" - 28:28.-0-
