18 лютага, Пхёнчхан /Кар. БЕЛТА/. Тытулаваны французскі біятланіст Мартэн Фуркад стаў пераможцам мужчынскай гонкі з мас-старту на 15 км з чатырма агнявымі рубяжамі на зімовых Алімпійскіх гульнях у Пхёнчхане, паведамляе карэспандэнт БЕЛТА.
Нягледзячы на два промахі пры першым і заключным заходах на стрэльбішча, Фуркад быў у ліку галоўных фаварытаў спаборніцтваў, што пацвердзіў на справе. Зрэшты, лёгкай прагулкі да чацвёртай у кар'еры залатой узнагароды галоўных стартаў чатырохгоддзя ў француза не атрымалася. Сур'ёзную барацьбу яму навязаў нямецкі біятланіст Сімон Шэмп, у пасіве якога быў толькі адзін промах пры стральбе. Лёс золата вырашыўся непасрэдна ля фінішнай мяжы. Фуркад апярэдзіў канкурэнта літаральна на нейкія сантыметры і стаў чатырохразовым алімпійскім чэмпіёнам. Двойчы ён падпімаўся на вышэйшую прыступку п'едэстала Гульняў-2014 у Сочы і цяпер паўтарыў гэта дасягненне ў Пхёнчхане. Тут ён таксама выйграў гонку праследавання.
Трэцяе месца ў сённяшніх спаборніцтвах пры дзвюх памылках на стрэльбішчы заняў нарвежац Эміль Хегле Свендсэн (+11,2 сек).
Беларускіх біятланістаў у ліку 30 удзельнікаў мас-старту не было.
Наступны від біятлоннай праграмы Алімпіяды-2018 - змешаная эстафета 2х6 км+2х7,5 км, якая пройдзе 20 лютага.-0-
