17 студзеня, Мінск /Кар. БЕЛТА/. Трохразовая алімпійская чэмпіёнка па біятлоне Дар'я Домрачава плануе ўдзельнічаць ва ўсіх этапах Кубка свету бягучага сезона. Аб гэтым спартсменка расказала ў эфіры праграмы "Арэна" на тэлеканале "Беларусь 1", паведамляе карэспандэнт БЕЛТА.
"У мяне ўсяго два месяцы падрыхтоўкі пасля нараджэння дачкі. Думаю, мне даволі добра ўдаецца змагацца на трасе. Спадзяюся, сілы застануцца да канца сезона. Планую ўдзельнічаць ва ўсіх этапах Кубка свету. Ці атрымаецца? Будзем глядзець па самаадчуванні", - адзначыла яна.
Дар'я Домрачава выказала ўдзячнасць за цёплы прыём, які ёй аказалі ў біятлоннай супольнасці пасля аднаўлення прафесійнай кар'еры, і расказала, як ёй удаецца спраўляцца з дачкой Ксеніяй. "Ксенія, як і любое іншае дзіця, некалькі разоў за ноч просіць есці. Мы добра адна адну разумеем, прыслухоўваюся да яе патрэбнасцей", - растлумачыла Дар'я Домрачава.
Беларуская біятланістка падзялілася меркаваннем, чаму можна навучыцца ў яе мужа - васьміразовага алімпійскага чэмпіёна Уле-Эйнара Б'ёрндалена. "Сабранасці і арганізацыйным здольнасцям", - адзначыла спартсменка.
Дар'я Домрачава, якая стала мамай 1 кастрычніка 2016 года, у студзені вярнулася да актыўных выступленняў на Кубку свету і прыняла ўжо ўдзел у этапах у Оберхофе і Рупольдынгу. 19 студзеня індывідуальнай гонкай на 15 км стартуе шосты этап у італьянскім Антхольцы.-0-