19 чэрвеня, Мінск /Кар. БЕЛТА/. Беларускі абаронца Данііл Бакун падпісаў гадавы двухбаковы кантракт з хакейным клубам "Дынама-Мінск", паведамілі БЕЛТА ў прэс-службе "зуброў".
Мінулы сезон Данііл Бакун пачынаў у складзе салігорскага "Шахцёра", а затым перабраўся ў мінскае "Дынама". У 18 матчах за "зуброў" на яго рахунку рэзультатыўная перадача, 6 мінут штрафу пры паказчыку карыснасці "-7".
У "Шахцёры" Данііл Бакун згуляў 36 матчаў (з улікам плэй-оф), зарабіў 11 ачкоў, 28 мінут штрафу і "+9". Абаронца дапамог салігарчанам заваяваць бронзавыя медалі чэмпіянату Беларусі. Таксама Данііл Бакун дэбютаваў у складзе нацыянальнай зборнай на чэмпіянаце свету па хакеі ў Нур-Султане.-0-