9 верасня, Мінск /Аліна Грышкевіч - БЕЛТА/. Беларусь прэтэндуе на правядзенне чэмпіянату Еўропы па лёгкай атлетыцы ў 2024 годзе. Аб гэтым паведаміў журналістам, адказваючы на пытанне карэспандэнта БЕЛТА, прэзідэнт Еўрапейскай лёгкаатлетычнай асацыяцыі (ЕЛА) Свен Арнэ Хансэн па выніках перагавораў з кіраўніком дзяржавы Аляксандрам Лукашэнкам.
Ён адзначыў, што Беларусь знаходзіцца ў ліку тых краін, якія прэтэндуюць на правядзенне гэтага міжнароднага спаборніцтва. Свен Арнэ Хансэн расказаў, што на сённяшняй сустрэчы з Аляксандрам Лукашэнкам абмяркоўваліся пытанні правядзення шэрага міжнародных спаборніцтваў, але не стаў удакладняць, якія менавіта з іх і калі могуць адбыцца ў Беларусі. "Мы абавязкова вернемся. У перспектыве нас чакае вельмі цікавая навіна", - сказаў кіраўнік асацыяцыі.
"Мы з нецярпеннем чакаем пачатку лёгкаатлетычнага матчу Еўропа - ЗША, - падзяліўся Свен Арнэ Хансэн. - Тры з паловай гады таму мы абмяркоўвалі з Аляксандрам Лукашэнкам ідэю правядзення такога матчу, і ён адразу ж сказаў так. І вось сёння мы тут".
Ён таксама расказаў аб сваіх уражаннях ад Беларусі: "У тым, што датычыцца спорту, я спрабую быць паслом Беларусі. Гэта сапраўды фантастычная краіна, цудоўны горад. На жаль, аб ёй не так шмат ведаюць у свеце. Спорт - выдатная магчымасць даць людзям больш інфармацыі аб вашай краіне".-0-
