10 чэрвеня, Мінск /Кар. БЕЛТА/. Бейсбалісты клуба "Мінск" занялі чацвёртае месца ў розыгрышы Кубка Еўрапейскай канфедэрацыі бейсбола (СЕВ), які завяршыўся ў чэшскім Брно, паведаміў карэспандэнту БЕЛТА трэнер мінчан Аляксандр Сячко.
У паядынку за 3-е месца другога па рангу кантынентальнага клубнага турніру мінчане на роўных змагаліся з французскім клубам "Мантыньі", але ўступілі ў дадатковым інінгу з лікам 2:3. На першым этапе спаборніцтваў шматразовыя чэмпіёны Беларусі занялі другое месца ў групе А, атрымаўшы перамогу над харвацкім "Вартэксам" (15:0) і швейцарскім "Цюрыхам" (11:8), пацярпеўшы паражэнне ад галоўнага фаварыта нямецкага "Хайдэнхайма" (0:20). У паўфінале мінчане ўступілі гаспадарам турніру бейсбалістам "Брно" з лікам 1:15.
У вырашальным матчы "Хайдэнхайм" перамог "Брно" з лікам 3:0 і атрымаў пуцёўку ў галоўны кантынентальны турнір - Кубак еўрапейскіх чэмпіёнаў.
Бейсбалісты "Мінска" ў бліжэйшыя выхадныя правядуць чарговыя сустрэчы чэмпіянату Беларусі. Пакуль яны ўпэўнена лідзіруюць, атрымаўшы перамогі ва ўсіх шасці матчах.
Нацыянальная зборная, якую таксама трэніруе Аляксандр Сячко, у пачатку ліпеня прыме ўдзел у чэмпіянаце Еўропы (дывізіён В). У славацкай Трнаве беларусы згуляюць у папярэдняй групе В з камандамі Славакіі (2 ліпеня), Літвы (3 ліпеня) і Румыніі (4 ліпеня). У групе А выступяць бейсбалісты Фінляндыі, Польшчы, Украіны і Швейцарыі. Па дзве лепшыя каманды выйдуць у паўфінал і прадоўжаць барацьбу за пуцёўку ў элітны дывізіён кантынентальнага чэмпіянату.-0-
