11 красавіка, Мінск /Кар. БЕЛТА/. Футбалісты іспанскай "Барселоны" перамаглі англійскі "Манчэстэр Юнайтэд" у гасцявым чвэрцьфінальным матчы Лігі чэмпіёнаў, паведамляе карэспандэнт БЕЛТА.
Сустрэча ў Манчэстэры пачалася з атак гаспадароў, але лік адкрылі госці. На 12-й мінуце Ліянэль Месі выдаў вельмі добры пас на Луіса Энрыке, пасля ўдару якога мяч рыкашэтам ад абаронцы Люка Шоу ўляцеў у вароты Давіда дэ Хеа. Прапусціўшы мяч, "Манчэстэр Юнайтэд" прадаўжаў атакаваць, але да перапынку адыграцца не ўдалося. У другім тайме манкуніянцы ўзмацнілі націск, але футбалісты "Барсы" спакойна адбілі ўсе атакі і давялі матч да перамогі - 1:0.
У Амстэрдаме лік таксама адкрылі госці: у самым канцы першай палавіны гульні вароты галандскага "Аякса" паразіў лідар атак італьянскага "Ювентуса" Крышціяну Раналду. Адразу пасля перапынку гаспадары аднавілі раўнавагу пасля сольнага праходу Давіда Нерэса, і больш лік не мяняўся - 1:1. Паядынкі ў адказ пройдуць 16 красавіка ў Барселоне і Турыне.
9 красавіка футбалісты лонданскага "Тотэнхэма" на полі сваёй новай арэны адолелі ў англійскім дэрбі "Манчэстэр Сіці" - 1:0, а лідар англійскага чэмпіянату "Ліверпуль" у сябе дома абыграў партугальскі "Порту" з лікам 2:0. У гэтых парах сустрэчы ў адказ за выхад у паўфінал чэмпіёнскай Лігі адбудуцца 17 красавіка ў Манчэстэры і Порту.
Сёння вечарам пройдуць першыя сустрэчы 1/4 фіналу другога па рангу кантынентальнага турніру - Лігі Еўропы: "Арсенал" (Лондан, Англія) - "Напалі" (Італія), "Бенфіка" (Лісабон, Партугалія) - "Айнтрахт" (Франкфурт, Германія), "Вільярэал" (Іспанія) - "Валенсія" (Іспанія), "Славія" (Прага, Чэхія) - "Чэлсі" (Лондан, Англія).-0-
